புரதச்சத்து நிறைந்த மீனின் நன்மைகள் – யார் சாப்பிட வேண்டும்? யார் தவிர்க்க வேண்டும்?

மனித உடலுக்கு புரதச்சத்து மிகவும் அவசியமான ஒன்று. நோய் எதிர்ப்பு சக்தியை அதிகரிக்கவும், தசைகளின் வலிமையை பராமரிக்கவும் புரதச்சத்து முக்கிய பங்காற்றுகிறது. அந்த வகையில் புரதச்சத்து நிறைந்த உணவுகளில் மீன் சிறந்ததாக கருதப்படுகிறது.

சித்த மருத்துவர் கு. சிவராமன் கூறியதாவது:
மீன் என்பது பெரியவர்கள் மட்டுமின்றி குழந்தைகளும் சாப்பிட வேண்டிய முக்கியமான உணவு. சைவ உணவில் பருப்பு, கீரை போன்றவற்றின் மூலம் புரதச்சத்து கிடைப்பதை வலியுறுத்துகிறோம்; அதேபோல் அசைவ உணவில் புரதச்சத்தை பெற மீன் அவசியம் சாப்பிட வேண்டும். எந்த வகை மீனாக இருந்தாலும் ஒதுக்காமல் சாப்பிடலாம்.

மீன் சாப்பிடுவதால் கிடைக்கும் நன்மைகள்:

• நோய் எதிர்ப்பு சக்தி குறைவாக உள்ளவர்கள் (குழந்தைகள், பெரியவர்கள்) அவசியம் மீன் சாப்பிட வேண்டும்.

• பருவகால தொற்றுகள், அடிக்கடி காய்ச்சல், சளி, இருமல் போன்ற பிரச்சனைகளை குறைக்கும்.

• ஒமேகா 3, ஒமேகா 6 போன்ற முக்கிய சத்துக்களின் சிறந்த ஆதாரமாக மீன் விளங்குகிறது. இவை சர்க்கரை நோய், இரத்த அழுத்தம், புற்றுநோய் போன்ற நாள்பட்ட நோய்களை தடுக்கும்.

• கொழுப்பு குறைவான அசைவ உணவாக இருப்பதால் மாரடைப்பு அபாயம், கொழுப்பு சேர்க்கை, உடல் எடை அதிகரிப்பு போன்ற பிரச்சனைகள் உள்ளவர்கள் இறைச்சிக்குப் பதிலாக மீன் சாப்பிடலாம்.

• பாலூட்டும் பெண்களுக்கு மீன் அவசியம். குறிப்பாக சுரா மீன் தாய்ப்பால் சுரப்பை அதிகரித்து, குழந்தைக்கு ஆரோக்கியமான தாய்ப்பாலை வழங்க உதவுகிறது.

• 

மீன் சாப்பிடக் கூடாதவர்கள்:

• தோல் நோய்கள் (கரப்பான், எக்ஸிமா, சொரியாசிஸ், அரிப்பு, நீர் கசிதல்) உள்ளவர்கள்.

• தோல் ஒவ்வாமை, ஆஸ்துமா, அர்டிக்கரியா, தோல் தடிப்பு பிரச்சனையுள்ளவர்கள்.

• குறிப்பாக இறால் போன்ற மீன் வகைகளை இவர்கள் தவிர்க்க வேண்டும்.

மற்றவர்கள் எல்லோரும் ஆரோக்கிய நலனுக்காக மீனைச் சாப்பிடலாம் என்று சித்த மருத்துவர் கு. சிவராமன் பரிந்துரைக்கிறார்.