விஜய் சொன்னதை செய்யும் விமல்; கலாய்க்கும் நெட்டிசன்கள்!

விஜய் சொன்னதை செய்வதாக விமலை நெட்டிசன்கள் கலாய்த்து வருகின்றனர்.

தமிழில் ‘வாகை சூடவா’, ‘மசாலா கஃபே’ உள்ளிட்டப் பல வெற்றிப் படங்களில் நடித்தவர் நடிகர் விமல். கடந்த மூன்று ஆண்டுகளாக இவருக்குத் தமிழ்ப் படங்கள் எதுவும் வெளிவராத நிலையில் கடந்த ஆண்டு வெளியான ‘விலங்கு’ வெப் சீரிஸ் நல்ல வரவேற்பைப் பெற்றது.

இந்த நிலையில், இவரது ‘தெய்வ மச்சான்’, ‘குலசாமி’ ஆகிய இரண்டு படங்களும் இந்த மாதம் 21ம் தேதி வெளியாக இருக்கிறது. ஒரே நாளில் அவருடைய இரண்டு படங்களும் வெளியாக இருக்கிறது.

சமீபத்தில் நடிகர் விஜய் ‘வாரிசு’ இசை வெளியீட்டு விழாவில் சொன்னது போலவே, ‘உனக்கு நீயே போட்டி’ என தன்னுடைய படங்களே தனக்குப் போட்டியாக வெளியிட இருக்கிறார் விமல் என நெட்டிசன்கள் இணையத்தில் அவரை கேலி செய்து வருகின்றனர்.

மார்ட்டின் நிர்மல் குமார் இயக்கத்தில் நடிகர் பாண்டிராஜூடன் இணைந்து விமல் முன்னணி கதாபாத்திரத்தில் நடித்திருக்கிறார். ‘ஆடுகளம்’ நரேன், பால சரவணன், அனிதா சம்பத் உள்ளிட்ட பலர் இதில் நடித்திருக்கின்றனர்.

அதேபோல, ‘குலசாமி’ படத்தை ‘குட்டிப்புலி’ படப்புகழ் சரவம சக்தி இயக்கி இருக்கிறார். தான்யா ஹோப் கதாநாயகியாக நடிக்க போஸ் வெங்கட், வினோதினி உள்ளிட்ட பலரும் நடித்துள்ளனர். ஆக்‌ஷன் த்ரில்லர் படமான இதற்கு நடிகர் விஜய்சேதுபதி வசனம் எழுதி இருக்கிறார் என்பது குறிப்பிடத்தக்கது.