“அரசிடம் பணம் இருக்கிறது” – விஜயின் முதல் பேச்சுக்கு ஸ்டாலின் பதில்!

தமிழகத்தின் புதிய முதல்வராக பதவியேற்ற விஜய் தனது முதல் உரையிலேயே மாநிலத்தின் நிதிநிலை குறித்து கருத்து தெரிவித்த நிலையில், முன்னாள் முதல்வர் எம்.கே. ஸ்டாலின் அதற்கு பதிலடி கொடுத்துள்ளார்.

விஜய் தனது முதல் உரையில், “முந்தைய அரசு ரூ.10 லட்சம் கோடிக்கும் அதிகமான கடனை விட்டுச்சென்றுள்ளது. அரசின் கருவூலம் காலியாகிவிட்டது” என்று கூறியிருந்தார். இதற்கு பதிலளித்த ஸ்டாலின், “தமிழ்நாட்டின் கடன் அளவு அனுமதிக்கப்பட்ட வரம்புக்குள் தான் உள்ளது” என விளக்கமளித்துள்ளார்.

தனது சமூக வலைதள பதிவில், “தமிழக வெற்றிக் கழகத் தலைவர் விஜய்க்கு மனமார்ந்த வாழ்த்துக்கள். பதவியேற்ற உடனே மக்கள் நலத் திட்டங்களில் கையொப்பமிட்டதை வரவேற்கிறேன்” என்று குறிப்பிட்டார்.

அதே நேரத்தில், “அரசிடம் பணம் இல்லை என்று ஆரம்பத்திலேயே கூறி மக்களை ஏமாற்ற வேண்டாம். பணம் இருக்கிறது. அதை மக்களுக்காக செலவிடும் மனமும், ஆட்சியை நடத்தும் திறனும் தான் முக்கியம்” என்றும் ஸ்டாலின் தெரிவித்துள்ளார்.

மேலும், தனது ஆட்சிக்காலத்தில் கொரோனா, வெள்ளப் பாதிப்பு மற்றும் மத்திய அரசின் ஒத்துழைப்பின்மை போன்ற சவால்களை எதிர்கொண்ட போதிலும் பல நலத்திட்டங்களை செயல்படுத்தியதாகவும் அவர் கூறினார்.

மறுபுறம், முதல்வர் விஜய் தனது ஆட்சி வெளிப்படைத்தன்மையுடன் இருக்கும் என்றும், மாநில நிதிநிலை குறித்து விரைவில் வெள்ளை அறிக்கை வெளியிடப்படும் என்றும் தெரிவித்துள்ளார்.

“தமிழ்நாட்டில் நான் யாரை சந்தித்தாலும் ரகசியமாக இருக்காது. நான் செய்வது அனைத்தும் வெளிப்படையாக இருக்கும்” என்று விஜய் தனது முதல் உரையில் தெரிவித்தார்.

மேலும், மக்கள் பணத்தை தவறாக பயன்படுத்தமாட்டேன் என்றும், கல்வி, சாலை, குடிநீர் உள்ளிட்ட அடிப்படை வசதிகளுக்கு முன்னுரிமை வழங்கப்படும் என்றும் அவர் உறுதியளித்தார்.

பதவியேற்ற உடனேயே விஜய், 200 யூனிட் இலவச மின்சாரம் வழங்கும் திட்டத்திற்கும், போதைப்பொருள் தடுப்பு மற்றும் பெண்கள் பாதுகாப்புக்கான சிறப்பு அதிரடிப்படைகள் அமைக்கும் கோப்புகளிலும் கையொப்பமிட்டுள்ளார்.

தமிழக அரசியலில் நடிகர்கள் அரசியலுக்கு வரும் பாரம்பரியத்தை மீண்டும் நினைவூட்டும் வகையில், விஜயின் அரசியல் எழுச்சி பெரும் கவனத்தை ஈர்த்துள்ளது. 2026 சட்டப்பேரவைத் தேர்தலில் பெரம்பூர் மற்றும் திருச்சி கிழக்கு தொகுதிகளில் வெற்றி பெற்ற விஜய், தற்போது தமிழக முதல்வராக பதவியேற்றுள்ளார்.