கட்டுரைகள்
IRS அதிகாரி இயக்கிய ‘Enemy of the Smuggler’ கடத்தல் உலகின் அதிர்ச்சி பின்னணி!
சுங்கத்துறை அதிகாரியின் அனுபவத்தில் உருவான கிரைம் திரில்லர்! அக்டோபர் 30-ல் வெளியாகும் ‘எனிமி ஆஃப் தி ஸ்மக்ளர்’!
கடத்தல் உலகத்தின் பின்னணி என்ன? சுங்கத்துறை அதிகாரிகள் எதிர்கொள்ளும் சவால்கள் என்னென்ன? இந்தக் கேள்விகளுக்கு அதிரடியும், சஸ்பென்ஸும் கலந்து பதில் சொல்ல வருகிறது ‘எனிமி ஆஃப் தி ஸ்மக்ளர்’ திரைப்படம்!
இந்தப் படத்தின் ஸ்பெஷலே என்ன தெரியுமா? இந்திய வருவாய் பணி அதிகாரியான தோ. சமய முரளி, தன்னுடைய சுங்கத்துறை விசாரணை அனுபவங்களை அடிப்படையாகக் கொண்டு இந்தப் படத்தை இயக்கியிருக்கிறார்.
கதை, திரைக்கதை, வசனம் மட்டுமில்லாமல், படத்துக்கு பின்னணி இசையும் அவரே அமைத்திருக்கிறார்.
ஏற்கனவே இந்தப் படத்திலிருந்து வெளியான இரண்டு பாடல்களும் ரசிகர்கள் மத்தியில் நல்ல வரவேற்பைப் பெற்றிருக்கின்றன. குறிப்பாக, ‘தாமரை’ பாடல் 2 மில்லியன் பார்வைகளைக் கடந்திருக்கிறது. அதேபோல, ‘தங்கம் தங்கம்’ பாடலும் 1 மில்லியன் பார்வைகளைக் கடந்து கவனம் ஈர்த்திருக்கிறது.
இதற்கிடையே, அக்டோபர் 14-ம் தேதி டீசர் வெளியாகியுள்ள நிலையில், படத்தின் டிரைலர் அக்டோபர் 19-ம் தேதி வெளியாகும் என அறிவிக்கப்பட்டுள்ளது. இதனால் படத்தின் மீதான எதிர்பார்ப்பும் அதிகரித்துள்ளது.
ஜே.டி. சக்கரவர்த்தி, லால், சரண் சக்தி, பால சரவணன், ஸ்மேஹா, ராதிகா சரத்குமார், காளி வெங்கட், ஜாஃபர் சாதிக், மைம் கோபி எனப் பலரும் இந்தப் படத்தில் முக்கிய கதாபாத்திரங்களில் நடித்திருக்கிறார்கள்.
கடத்தல் உலகம், அதன் பின்னணியில் நடக்கும் குற்றங்கள், சுங்கத்துறையின் அதிரடியான நடவடிக்கைகள் என விறுவிறுப்பான கதைக்களத்தில் இந்தப் படம் உருவாகியிருக்கிறது.
2008-ம் ஆண்டு ஐஆர்எஸ் அதிகாரிகள் பிரிவில் சேர்ந்த தோ. சமய முரளி, சுங்கத்துறை அமலாக்கம் மற்றும் மறைமுக வரிவிதிப்புத் துறைகளில் நீண்ட காலமாகப் பணியாற்றியிருக்கிறார். மேலும், சிறப்பான பணிக்காக 2021-ம் ஆண்டு உலக சுங்க அமைப்பு வழங்கிய உயரிய விருதையும் பெற்றிருக்கிறார்.
இந்தப் படம் குறித்து இயக்குநர் சமய முரளி பேசும்போது, தான் விசாரித்த பல சுங்கத்துறை வழக்குகளை அடிப்படையாகக் கொண்டு, கற்பனைக் கதையாக இந்தப் படத்தை உருவாக்கியுள்ளதாகத் தெரிவித்துள்ளார்.
அதேபோல, கடத்தல் மற்றும் நிழல் உலகத்தின் செயல்பாடுகளை மக்களிடம் கொண்டு சேர்ப்பதுடன், நாட்டின் பொருளாதாரப் பாதுகாப்பில் சுங்கத்துறை வகிக்கும் முக்கியப் பங்கு குறித்த விழிப்புணர்வையும் ஏற்படுத்துவதே படத்தின் நோக்கம் என்றும் கூறியிருக்கிறார்.
எஸ். ராம்பிரகாஷ் தயாரிப்பில், எஸ்.ஆர். ட்ரீம் ஸ்டுடியோஸ் சார்பில் உருவாகியுள்ள இந்தத் திரைப்படம், வரும் அக்டோபர் 30-ம் தேதி தமிழகம் முழுவதும் திரையரங்குகளில் வெளியாகிறது.
ஏற்கனவே பாடல்கள் கவனம் ஈர்த்துள்ள நிலையில், டிரைலர் என்ன மாதிரியான எதிர்பார்ப்பை ஏற்படுத்தப் போகிறது? சுங்கத்துறையின் மறுபக்கத்தைப் பேசும் இந்தக் கிரைம் திரில்லர் ரசிகர்களைக் கவருமா? என்பதைப் பொறுத்திருந்து பார்ப்போம்!
