“மத்திய கிழக்கு வங்கக்கடலில் ‘டானா’ புயல்: இரண்டாம் எண் எச்சரிக்கை, மீனவர்கள் கடலுக்குச் செல்லத் தடை”!

மத்திய கிழக்கு வங்கக் கடலில் உருவான காற்றழுத்த தாழ்வு மண்டலம் தற்போது வலுப்பெற்று, பாம்பன் கடல்சார் துறைமுக அலுவலகத்தில் இரண்டாம் எண் புயல் எச்சரிக்கை கூண்டு ஏற்றப்பட்டுள்ளது. இந்த காற்றழுத்தத் தாழ்வு மண்டலம் வடமேற்கு திசையில் நகர்ந்து, ஆழ்ந்த காற்றழுத்த மண்டலமாக மாற்றம் பெற்று, “டானா” புயலாக உருவாகியுள்ளது.

புயல் ஒடிசா மாநிலத்தின் கரையை அடைந்தாலும், தமிழகத்தில் பாதிப்பு ஏதும் இருக்காது என வானிலை ஆய்வு மையம் தெரிவித்துள்ளது. புயல் 18 கிலோமீட்டர் வேகத்தில் கரையை கடக்கும் நிலையில், காற்றின் வேகம் அதிகமாக இருக்கும் என்பதால் மீனவர்கள் கடலுக்குச் செல்ல வேண்டாம் என எச்சரிக்கை விடுக்கப்பட்டுள்ளது.

மேலும், காற்றின் வேகத்தால் விசைப்படகுகள் ஒருவருடன் ஒருவர் மோதி சேதமடையக் கூடும் என்பதால், விசைப்படகுகளை இடைவெளி வைத்து பாதுகாப்பாக நிறுத்த வேண்டும் என அதிகாரிகள் அறிவுறுத்தியுள்ளனர்.