பர்சனல் ஃபினான்ஸ்
ஒரே டிக்கெட்டில் பல நகரங்களுக்கு பயணம்: இந்திய ரயில்வேயின் ‘சர்க்யூலர் ஜர்னி டிக்கெட்’ விதி பற்றி தெரியுமா?
இந்தியாவில் தினமும் கோடிக்கணக்கான மக்கள் ரயில்களில் பயணம் செய்கிறார்கள். ஆனால், இந்திய ரயில்வே வழங்கும் பல வசதிகள் இன்னும் பல பயணிகளுக்கு தெரியாமலேயே இருக்கின்றன. அவற்றில் முக்கியமான ஒன்று சர்க்யூலர் ஜர்னி டிக்கெட் (Circular Journey Ticket). குறிப்பாக சுற்றுலா பயணிகள் மற்றும் யாத்திரை செல்லும் பக்தர்களுக்கு இந்த டிக்கெட் மிகவும் பயனுள்ளதாக இருக்கிறது. தகவல் குறைவு காரணமாக இதைப் பயன்படுத்துபவர்கள் குறைவு. எனவே, ஒரே டிக்கெட்டில் பல நகரங்களுக்கு எப்படி பயணம் செய்யலாம் என்பதை இப்போது பார்ப்போம்.
சர்க்யூலர் ஜர்னி டிக்கெட் என்றால் என்ன?
இந்திய ரயில்வே விதிகளின்படி, ஒரே நிலையிலிருந்து பயணம் தொடங்கி, அதே நிலையிலேயே முடியும் பயணங்களுக்கு சர்க்யூலர் ஜர்னி டிக்கெட் வழங்கப்படுகிறது. இந்த டிக்கெட்டின் மூலம், பயணிகள் முன்கூட்டியே நிர்ணயிக்கப்பட்ட பாதையில் பல நகரங்கள், பல நிலையங்களைச் சுற்றிப் பயணம் செய்து, இறுதியில் துவங்கிய நிலையத்திற்கே திரும்பலாம்.
இந்த டிக்கெட்டின் முக்கிய சிறப்பு என்னவென்றால், ஒரே டிக்கெட்டில் அதிகபட்சம் 8 நிலையங்கள் வரை பயணம் செய்ய அனுமதி வழங்கப்படுகிறது. மேலும், இந்த பயணத்தின் போது வேறு வேறு ரயில்களில் பயணம் செய்வதற்கும் அனுமதி உள்ளது. இதனால் சுற்றுலா மற்றும் புனித யாத்திரை பயணங்களுக்கு இது மிகவும் உதவியாக இருக்கிறது.
56 நாட்கள் வரை செல்லுபடியாகும் டிக்கெட்
சர்க்யூலர் ஜர்னி டிக்கெட் 56 நாட்கள் வரை செல்லுபடியாகும். அதாவது, பயணிகள் தங்களது சுற்றுலா அல்லது யாத்திரை திட்டத்திற்கு ஏற்ப கட்டங்களாக (stages) பயணம் செய்யலாம். ஒவ்வொரு நகரத்திற்கும் தனித்தனியாக டிக்கெட் முன்பதிவு செய்ய வேண்டிய அவசியம் இல்லை.
மேலும், இந்த டிக்கெட்டில் டெலிஸ்கோபிக் கட்டணம் (Telescopic Fare) நடைமுறையில் உள்ளது. இதன் பொருள், பயணத்தில் சேர்க்கப்படும் நிலையங்கள் அதிகரிக்கும் போது, ஒரு கிலோமீட்டருக்கான கட்டணம் குறையும். இதனால் தனித்தனியாக டிக்கெட்டுகள் எடுப்பதைவிட, சர்க்யூலர் ஜர்னி டிக்கெட் மிகவும் குறைந்த செலவாக அமைகிறது.
யார் யார் இந்த டிக்கெட்டை பயன்படுத்தலாம்?
சர்க்யூலர் ஜர்னி டிக்கெட்:
ஸ்லீப்பர் கிளாஸ் முதல் ஃபர்ஸ்ட் கிளாஸ் வரை அனைத்து வகுப்புகளிலும் வழங்கப்படுகிறது
தனிநபர்களுக்கும், குழு பயணிகளுக்கும் கிடைக்கும்
மூத்த குடிமக்களுக்கு (Senior Citizens) கட்டண தள்ளுபடி வழங்கப்படுகிறது
ஆனால், பயண தூரம் குறைந்தது 1000 கிலோமீட்டர் இருக்க வேண்டும்
சர்க்யூலர் ஜர்னி டிக்கெட்டை எப்படி பெறுவது?
இந்த டிக்கெட் நேரடியாக டிக்கெட் கவுண்டரில் கிடைக்காது. இதற்காக பயணிகள் முதலில் தங்களது முழு பயண பாதை விவரங்களை (Route Details) ரயில்வே அதிகாரிகளிடம் வழங்க வேண்டும். அந்த பாதை இறுதியாக நிர்ணயிக்கப்பட்ட பிறகு:
பயண கட்டணம் கணக்கிடப்படும்
குறிப்பிட்ட நிலையத்தில் இருந்து டிக்கெட் பெறலாம்
பயணத்தின் ஒவ்வொரு கட்டத்திற்கும் தனித்தனியாக சீட் முன்பதிவு செய்யலாம்
ஒரே டிக்கெட்டில் பல நகரங்களைச் சுற்றிப் பார்க்க விரும்பும் சுற்றுலா பயணிகள் மற்றும் ஆன்மிக யாத்திரை செல்லும் பக்தர்களுக்கு, சர்க்யூலர் ஜர்னி டிக்கெட் என்பது ஒரு சிறந்த, செலவு குறைந்த வாய்ப்பாகும்.
