சொந்தமாக காரோ, நிலமோ இல்லாத பிரதமர் மோடியின் சொத்து மதிப்பு!

பிரதமர் நரேந்திர மோடி தனக்கு சொந்தமாக நிலமோ, கட்டிடமோ, வாகனமோ இல்லை எனவும் தனக்கு 2.51 கோடி ரூபாய் சொத்து மட்டுமே உள்ளது எனவும் தனது வேட்புமனுவில் கூறியுள்ளார்.

வாரணாசி மக்களவை தொகுதியில் போட்டியிட உள்ள பிரதமர் நரேந்திர மோடி தனது வேட்புமனுவை நேற்று கூட்டணி கட்சி தலைவர்கள் புடைசூழ வாரணாசி மாவட்ட ஆட்சியர் அலுவலகத்தில் தாக்கல் செய்தார். அந்த வேட்பு மனுவில் பிரதமர் மோடி தெரிவித்துள்ள அவரது சொத்து மதிப்பு விபரங்கள் வெளியாகி உள்ளது.

அதில் மொத்தம் 2.51 கோடி ரூபாய் சொத்துக்கள் இருப்பதாக அவர் குறிப்பிட்டுள்ளார். அவரின் அசையும் சொத்துக்களின் மதிப்பு ரூபாய் 1.41 கோடியாகவும், அசையா சொத்துக்கள் மதிப்பு ரூபாய் 1.1 கோடியாகவும் இருக்கிறது.

கடந்த ஐந்து ஆண்டுகளில் 2014-இல் மோடியின் ஆண்டு வருமானம் ரூபாய் 9.69 லட்சம், 2015-இல் ரூபாய் 8.58 லட்சம், 2016-இல் ரூபாய் 19.23 லட்சம், 2017-இல் ரூபாய் 14.59 லட்சம், 2018-இல் ரூபாய் 19.92 லட்சம் என குறிப்பிட்டுள்ளார். மோடியின் வருமானத்துக்கு மூல ஆதாரமாக உள்ளவை அரசிடமிருந்து வரும் சம்பளப் பணமும், வங்கிகளிலிருந்து வரும் வட்டியும் ஆகும்.

அசையும் சொத்துக்களைப் பொறுத்தவரை மோடியின் கையிருப்பில் 38750 ரூபாய் உள்ளது. வங்கிக் கணக்கில் வெறும் 4143 ரூபாய் உள்ளது. ஸ்டேட் பேங் ஆஃப் இந்தியாவில் நிரந்தர வைப்புத் தொகையாக 1.27 கோடி ரூபாய் இருப்பதாகவும் குறிப்பிட்டுள்ளார். மேலும் 20 ஆயிரம் ரூபாய் மதிப்புள்ள பத்திரமும், 7.61 லட்சம் ரூபாய் மதிப்புள்ள சேமிப்புப் பத்திரங்களும் உள்ளதாகத் தெரிவித்துள்ள மோடி ஆயுள் காப்பீடு திட்டங்களில் 1.90 லட்சம் ரூபாயை முதலீடு செய்துள்ளார்.

மோடிக்கு சொந்தமாக 45 கிராம் மதிப்புள்ள 4 தங்க மோதிரங்கள் உள்ளன. இதன் மதிப்பு 1.13 லட்சம் ரூபாய். வருமான வரித்துறையிடமிருந்து டிடிஎஸ் பணம் 85145 ரூபாய் வரவேண்டியுள்ளது. பிரதமர் அலுவலகத்தில் 1.40 லட்சம் ரூபாய் வர வேண்டியுள்ளது. சொந்தமாக நிலமோ, கட்டிடங்களோ அல்லது வாகனங்களோ இல்லை. ஒரே ஒரு அசையா சொத்தாக குஜராத்தின் காந்தி நகரில் 25 சதவிகித பங்குடன் ரூபாய் 1.10 கோடி மதிப்புடைய வீடு உள்ளதாக தெரிவித்துள்ளார்.