கண்ணுக்கு அழகாகத் தெரியும் மாம்பழம் – உடலுக்கு ஆபத்தா? ரசாயன மாம்பழங்களை எப்படி கண்டுபிடிப்பது

கோடை காலம் வந்துவிட்டால் இந்தியா முழுவதும் மாம்பழங்கள் சந்தையில் குவியும். ஆனால் கண்ணுக்கு மின்னும், சீராக மஞ்சள் நிறத்தில் இருக்கும் மாம்பழங்களை வாங்குவது பாதுகாப்பானது என்றில்லை. சில வியாபாரிகள் லாபத்திற்காக இயற்கையாக பழுக்க விடாமல் Calcium Carbide போன்ற ஆபத்தான ரசாயனங்களை பயன்படுத்தி மாம்பழங்களை பழுக்கச் செய்கிறார்கள். இது உடல்நலத்திற்கு தீங்கு விளைவிக்கும் என்பதால் அதிகாரிகள் கூட மக்கள் எச்சரிக்கையாக இருக்கும்படி அறிவுறுத்தியுள்ளனர்.

இயற்கையாக பழுத்த மாம்பழங்களில் ஒரே மாதிரியான நிறம் இருக்காது. பச்சை, மஞ்சள், சில சமயம் சிவப்பு கலந்த நிறம் இருக்கும். ஆனால் ரசாயன முறையில் பழுக்கச் செய்யப்பட்ட மாம்பழங்கள் மிகவும் அழகாக, ஒரே மாதிரி மஞ்சள் அல்லது தங்க நிறத்தில் இருக்கும். வெளியே பழுத்தது போல தெரிந்தாலும் உள்ளே கச்சையாக இருக்கலாம். இதை கண்டுபிடிக்க மணத்தை கவனிக்கலாம் — இயற்கை மணம் இல்லாமல், சற்றே வேறுபட்ட வாசனை இருந்தால் அது சந்தேகமாகும். தோலில் வித்தியாசமான புள்ளிகள் அல்லது தழும்புகள் இருந்தாலும் கவனிக்க வேண்டும். பேக்கிங் சோடா நீரில் கழுவும் போது நிறம் மாறினால் அது ரசாயன சிகிச்சையின் அறிகுறியாக இருக்கலாம். சுவையில் கசப்பு அல்லது இயல்பற்ற ருசி இருந்தால் அதை தவிர்க்க வேண்டும்.

இந்த மாதிரி ரசாயன மாம்பழங்களை சாப்பிடுவதால் உடனடி பிரச்சினைகளாக தொண்டை எரிச்சல், வாந்தி, வயிற்றுப்போக்கு போன்றவை ஏற்படலாம். நீண்ட காலத்தில் நரம்பு மண்டலம் பாதிப்பு, சுவாச கோளாறு போன்ற தீவிர பிரச்சினைகளும் ஏற்படும் அபாயம் உள்ளது. அதனால் மாம்பழம் வாங்கும் போது அதன் அழகை மட்டும் பார்க்காமல், அதன் இயற்கை தன்மையையும் கவனித்து தேர்வு செய்வது மிகவும் அவசியம்.