குடல் புற்றுநோயின் ஆரம்ப எச்சரிக்கை அறிகுறிகள் – தவறாமல் கவனிக்க வேண்டியது அவசியம்!

உலகில் அதிக உயிரிழப்புகளை ஏற்படுத்தும் நோய்களில் புற்றுநோய் முக்கியமானது. அதில் குடல் புற்றுநோய் (Colon Cancer) உலகளவில் புற்றுநோயால் ஏற்படும் இறப்புகளில் இரண்டாவது பெரிய காரணமாகக் கூறப்படுகிறது. இது பொதுவாக 50 வயதுக்கு மேற்பட்டவர்களை அதிகம் தாக்கினாலும், சமீப காலங்களில் இளம் வயதினரிடையிலும் அதிகரித்து வருவது கவலைக்குரியது.

ஆய்வுகள் கூறுவதாவது, 1950-களில் பிறந்தவர்களுடன் ஒப்பிடுகையில் 1990-களில் பிறந்தவர்களுக்கு குடல் புற்றுநோய் ஏற்படும் அபாயம் இருமடங்கு அதிகம் உள்ளது.

குடல் புற்றுநோய் வருவதற்கு தவறான உணவு பழக்கம், உடலுழைப்பு குறைவு, உடல் பருமன், புகைபிடித்தல், மதுவை அதிகம் அருந்துதல் போன்ற வாழ்க்கை முறை காரணிகளே முக்கிய காரணிகள். ஆனால், ஆரம்பத்திலேயே இதை கண்டறிந்து சிகிச்சை பெற்றால், உயிரிழப்பைத் தவிர்க்கலாம். அதனால் குடல் புற்றுநோயின் ஆரம்ப எச்சரிக்கை அறிகுறிகளை அனைவரும் தெரிந்து கொள்ள வேண்டும்.

குடல் புற்றுநோயின் முக்கிய எச்சரிக்கை அறிகுறிகள்:

1. குடலியக்க மாற்றம் – மலச்சிக்கல், வயிற்றுப்போக்கு போன்ற பிரச்சனைகள் வாரங்கள் தொடர்ந்தால், மருத்துவரை அணுக வேண்டும்.

2. இரத்தம் கலந்த மலம் – ஆசனவாயில் இரத்தக்கசிவு ஏற்பட்டால், உடனே பரிசோதனை அவசியம்.

3. வயிற்று வலி – வழக்கத்திற்கு மாறாக தொடர்ந்து அடிவயிற்று வலி இருந்தால், அலட்சியம் செய்யக்கூடாது.

4. எடை இழப்பு – காரணமின்றி திடீரென எடை குறைந்தால், அது குடல் புற்றுநோயின் ஆரம்ப அறிகுறியாக இருக்கலாம்.

5. தொடர்ச்சியான சோர்வு – போதிய ஓய்வு எடுத்தாலும் சோர்வாக இருந்தால், அது புற்றுநோயின் அடையாளமாக இருக்கலாம்.

குடல் புற்றுநோயின் ஆரம்ப கட்டத்தில் சரியான சிகிச்சை மேற்கொண்டால், அதை வெல்ல இயலும். எனவே எச்சரிக்கை அறிகுறிகளை அலட்சியம் செய்யாமல் உடனடியாக மருத்துவரை அணுகுவது மிகவும் முக்கியம்.