17000 ரன்களை நோக்கி தோனி: இன்றைய போட்டியை மிஸ் பண்ணிடாதீங்க!

இந்தியாவுக்கு சுற்றுப்பயணம் மேற்கொண்டுள்ள ஆஸ்திரேலிய கிரிக்கெட் அணி ஏற்கனவே டி20 தொடரை வென்றது. இந்நிலையில் தற்போது ஒருநாள் கிரிக்கெட் தொடர் நடந்து வருகிறது. இதில் முதல் இரண்டு போட்டிகளையும் இந்திய அணி வென்றுள்ள நிலையில் மூன்றாவது ஒருநாள் போட்டி இன்று பகல் இரவு போட்டியாக நடக்க உள்ளது. இந்த போட்டியிலும் வென்று தொடரை கைப்பற்ற இந்தியா முயற்சிக்கும்.

இந்திய கிரிக்கெட் வீரர் தோனியின் சொந்த மண்ணான ராஞ்சியில் இந்த போட்டி நடைபெற உள்ளது. தோனி உலகக்கோப்பையுடன் கிரிக்கெட்டில் இருந்து ஓய்வுபெற்றுவிட்டால் இதுதான் தோனி சொந்தமண்ணில் விளையாடும் கடைசி சர்வதேச போட்டியாக அமையும். இதனையொட்டி ராஞ்சியில் இந்த போட்டியில் அவருக்கு சிறப்பு மரியாதை அளிக்கப்பட வாய்ப்புக்கள் உள்ளது.

மேலும் இன்றையை போட்டியில் தோனி சர்வதேச அரங்கில் 17000 ரன்களை கடந்து சாதனை படைப்பாரா என்ற எதிர்பார்ப்பு உருவாகியுள்ளது. டெஸ்ட் போட்டிகளில் 4876 ரன்களும், ஒருநாள் போட்டிகளில் 10474 ரன்களும், டி20 போட்டிகளில் 1617 ரன்களும் என தோனி இதுவரை 16967 ரன்கள் எடுத்துள்ளார். இதனையடுத்து அவர் 17000 ரன்கள் என்ற மைல்கல்லை அடைய அவருக்கு மேற்கொண்டு 33 ரன்கள் தான் தேவை. எனவே இதனை தோனி இந்த போட்டியில் எடுத்து சாதனை படைப்பார் என எதிர்பார்க்கப்படுகிறது.

இந்த சாதனையை தோனி நிகழ்த்தும் பட்சத்தில் சர்வதேச போட்டிகளில் 17000 ரன்களைத் தொடும் ஆறாவது இந்திய வீரர் என்ற பெருமையை பெறுவார். இதற்கு முன்னர் இந்திய அணியில் சச்சின் டெண்டுல்கர், டிராவிட், விராட் கோலி, கங்குலி, சேவாக் ஆகியோர் இந்த சாதனையை படைத்துள்ளனர். இந்த வரிசையில் ஆறாவது வீரராக தோனியும் இணைய உள்ளார்.