ஐபிஎல் வரலாற்றில் புதிய சாதனை: மும்பையை வீழ்த்தி 20வது வெற்றியை பதிவு செய்த சிஎஸ்கே!

ஐபிஎல் வரலாற்றில் சென்னை சூப்பர் கிங்ஸ் அணி புதிய சாதனையை படைத்துள்ளது. மும்பை இந்தியன்ஸ் அணியை 8 விக்கெட் வித்தியாசத்தில் வீழ்த்திய சிஎஸ்கே, மும்பைக்கு எதிராக 20 வெற்றிகளைப் பெற்ற முதல் அணியாக வரலாற்றில் இடம்பிடித்துள்ளது.

சென்னை சேப்பாக்கம் மைதானத்தில் நடைபெற்ற இந்த முக்கிய போட்டியில் டாஸ் வென்ற மும்பை இந்தியன்ஸ் கேப்டன் ஹர்திக் பாண்டியா முதலில் பேட்டிங்கை தேர்வு செய்தார். ஆனால் சிஎஸ்கே பந்துவீச்சாளர்களின் கட்டுப்படுத்தப்பட்ட பந்துவீச்சால் மும்பை அணி ஆரம்பத்திலிருந்தே தடுமாறியது.

தொடர்ச்சியாக விக்கெட்டுகளை இழந்த மும்பை அணி, நிர்ணயிக்கப்பட்ட 20 ஓவர்களில் 7 விக்கெட் இழப்பிற்கு 159 ரன்கள் மட்டுமே எடுத்தது. அந்த அணியின் நமன் திர் மட்டும் பொறுப்புடன் விளையாடி 57 ரன்கள் சேர்த்தார். சென்னை அணியின் வேகப்பந்து வீச்சாளர் கம்போஜ் சிறப்பாக பந்துவீசி 3 முக்கிய விக்கெட்டுகளை கைப்பற்றினார்.

160 ரன்கள் எடுத்தால் வெற்றி என்ற இலக்குடன் களமிறங்கிய சிஎஸ்கே அணிக்கு ஆரம்பத்திலேயே ஜஸ்பிரித் பும்ரா அதிர்ச்சி கொடுத்தார். போட்டியின் 2ஆவது ஓவரில் சஞ்சு சாம்சனின் விக்கெட்டை வீழ்த்தியதால் ரசிகர்கள் அதிர்ச்சியடைந்தனர்.

எனினும், கேப்டன் ருதுராஜ் அமைதியாகவும் நிதானமாகவும் விளையாடி அணியை வெற்றிப் பாதைக்கு அழைத்துச் சென்றார். உர்வில் படேல் 24 ரன்கள் எடுத்த நிலையில் ஆட்டமிழந்தார். பின்னர் களமிறங்கிய கார்த்திக் சர்மா அதிரடியாக விளையாடி தனது முதல் ஐபிஎல் அரைசதத்தை பதிவு செய்தார்.

இவர்களின் சிறப்பான கூட்டணியால் சென்னை அணி 18.1 ஓவர்களில் இலக்கை எட்டிச் 8 விக்கெட் வித்தியாசத்தில் அபார வெற்றி பெற்றது. இந்த வெற்றியின் மூலம் சிஎஸ்கே புள்ளிப்பட்டியலில் 6ஆவது இடத்துக்கு முன்னேறியுள்ளது. மேலும், மும்பை இந்தியன்ஸ் அணிக்கு எதிராக 20 வெற்றிகள் பெற்ற முதல் ஐபிஎல் அணியாக சென்னை சூப்பர் கிங்ஸ் புதிய வரலாற்றுச் சாதனையை உருவாக்கியுள்ளது.