40 வயதிற்கு பிறகு ஆண், பெண் இருவரும் அவசியம் செய்ய வேண்டிய 5 முக்கிய உடற்பயிற்சிகள்!

40 வயதிற்கு பிறகு, ஆண், பெண் இருவரின் உடலில் பல மாற்றங்கள் நிகழ்கின்றன. தசைகள் தளர்வதும், எலும்புகள் பலவீனமாவதும், இதய ஆரோக்கியம் குறைவதுமாக பல சவால்கள் உருவாகின்றன. எனவே, மருத்துவ நிபுணர்கள் கூறுவதாவது — உடலைச் சுறுசுறுப்பாகவும், மனதை அமைதியாகவும் வைத்திருக்க சில குறிப்பிட்ட உடற்பயிற்சிகளை தினசரி அல்லது வாராந்திரமாக செய்வது அவசியம்.

1. வேகமான நடைப்பயிற்சி:
தினமும் குறைந்தது 30 நிமிடங்கள் வேகமாக நடப்பது இதய ஆரோக்கியத்தை மேம்படுத்தும். கைகளை நன்கு வீசி, நேராக நடப்பது மட்டுமல்லாமல், சில நாட்களில் பின்னோக்கி அல்லது பக்கவாட்டில் நடப்பதும் நல்ல பயிற்சி. இது கெட்ட கொழுப்பைக் கரைத்து, உடல் எடையை குறைத்து, மன அமைதியையும் தரும்.

2. யோகா:
வாரத்தில் 3 அல்லது 4 நாட்கள் யோகா செய்யலாம். சூரிய நமஸ்காரம், பிராணாயாமம் போன்ற ஆசனங்கள் மன அழுத்தத்தை குறைத்து, சுவாசத்தைச் சீராக வைக்கும். மேலும், ஹார்மோன்களின் சமநிலையையும் பேணுகிறது. ஒரு பயிற்சி நிபுணரின் வழிகாட்டுதலுடன் செய்வது சிறந்தது.

3. லேசான எடை பயிற்சி:
ஜிம்மிற்கு செல்ல வேண்டிய அவசியம் இல்லை. வீட்டிலேயே டம்பெல்ஸ் அல்லது ரெசிஸ்டன்ஸ் பேண்டுகள் கொண்டு எளிய எடைப் பயிற்சிகள் செய்யலாம். இது தசைகளின் வலிமையை அதிகரித்து, எலும்புகளை உறுதியாக வைக்கும்.

4. சைக்கிள் ஓட்டுதல்:
தினமும் 20 முதல் 30 நிமிடங்கள் மிதமான வேகத்தில் சைக்கிள் ஓட்டுவது இதயமும் நுரையீரல்களும் ஆரோக்கியமாக இருப்பதற்குத் துணைபுரியும். இதன் மூலம் உடலில் சக்தி நிலை உயர்ந்து, பொறுமையும் கூடும்.

5. சமநிலை மற்றும் நீட்சி பயிற்சிகள்:
வயதான பிறகு ஏற்படும் மூட்டு வலி, தசைப்பிடிப்பு ஆகியவற்றைத் தவிர்க்க, நீட்சி பயிற்சிகள் உதவும். ஒற்றைக்காலில் நிற்பது அல்லது தை சி (Tai Chi) போன்ற சமநிலை பயிற்சிகள் உடலின் நிலைத்தன்மையை பேணுவதோடு, விழுந்து காயம் அடைவதைத் தடுக்கும்.

 40 வயதுக்கு பிறகு உடல்நலனை பராமரிக்க தினசரி உடற்பயிற்சி தவிர்க்க முடியாத ஒன்றாகும். இது உடலையும் மனதையும் இளமையாக வைத்திருக்கும் சிறந்த மருந்தாகும்.