இந்த வார பயாஸ்கோப். – சைகை மொழியை கற்றுத் தரும் “தி சைலண்ட் சைல்டு“

உடலாலும் உள்ளத்தாலும் சவால்கள் உள்ளவர்களை நாம் எப்படி நடத்த வேண்டும் என்பதை எதார்த்தமாக காட்சிப்படுத்தியுள்ளது இந்த குறும்படம். மாற்றுத் திறன் உள்ள குழந்தைகளிடம் அன்பு செலுத்தி அவர்களுக்கு தேவையானவற்றை அறிந்து வழிநடத்த வேண்டும் என்ற செய்தியை பார்க்கும் அணைவருக்கும் சொல்கிறது இந்த படம். இந்த குறும்படம் 2018 ம் ஆண்டுக்கான குறும்படங்களுக்கான ஆஸ்கார் விருதை வென்றுள்ளது.

இநத திரைப்படம் அதிகமான உரையாடல்கள் ஏதுமில்லாமல் சைகை மொழியால் நமக்குள் அன்பைக் கடத்தி சிலிர்க்க வைக்கிறது.

இந்தப் படத்தின் முக்கியமான கதாபாத்திரம் நான்கே வயது நிரம்பிய லிபி என்ற சிறுமி. அமைதியான குழந்தை. அவளுக்கு காது கேட்காது. அவளுடைய குடும்பத்தில் உள்ளவர்கள் அவளை கண்டு கொள்ளாமல் அவரவர் வேலையை மட்டும் பார்த்துக் கொண்டு இருப்பார்கள். அந்த சிறுமியை பார்த்துக்கொள்ள சமூக சேவை செய்யும் ஜோன் என்ற பெண் நியமிக்கப் படுகிறாள். இவள் இந்த இளம் சிறுமிக்கு சைகை மொழியில் எப்படி பேசுவது என்பதை மிகவும் எளிமையாக கற்றுக் கொடுக்கிறாள். அந்த சிறுமியும் அதனை புரிந்து கொண்டு தனது கருத்தக்களை சைகை மொழியில் தெரிவிக்க தொடங்குகிறாள்.லிபியும் ஜோனும் சந்தோஷமாக விளையாடி தங்கள் பொழுதைக் கழித்து வருகிறார்கள். தன்னை கண்டு கொள்ளாத தனது குடும்பத்தினரிடம் கிடைக்காத பாசத்தை லிபி ஜோனிடம் பெற்று மகிழ்கிறாள்.

சிறுமியை அவளது குடும்பத்தினர் எல்லாக் குழந்தைகளும் படிக்கும் பள்ளியில் சேர்த்து விடுகின்றனர். இங்கு அவள் மிகுந்த சிரமப்படுகிறாள். அந்தப் பள்ளிக்கு அவளை வீட்டில் பராமரித்த ஜோன் அங்கு வருகிறாள். சிறுமி அவளைப் பார்த்ததும் சந்தோஷ மிகுதியில் தனது கைகளை நீட்டுகிறாள். அந்தக் காட்சி இந்த சின்ன சிறுமியின் உணர்வுகளை அற்புதமாக வெளிப்படுத்துகிறது.

இப்படியாக உரையாடல்கள் அவ்வளவாக இல்லாத அந்த படத்தை கிறிஸ் ஓவர்டன் இயக்கியுள்ளார். இந்த அழகான கதையை ரேச்சல் சென்டன் என்பவர் எழுதியுள்ளார். நூற்றுக்கும் மேற்பட்ட பல்வேறு விருதுகளை வென்ற இந்த பிரிட்டிஷ் சைகை மொழி படத்தை 2017ல் ஸ்லிக் பிலிம்ஸ் நிறுவனம் வெளியிட்டது. இது தொலைக்காட்சியில் பிபிசி ஒன்னில் 3.6 மில்லியன் பார்வையாளர்களைப் பெற்றது.

காது கேளாத குழந்தைகள் சரியான ஆதரவு இருந்தால் ஒரு கேட்கும் குழந்தையைப் போல எல்லா வகையிலும் வெற்றி பெற முடியும் என்ற வார்த்தைகளுடன் படம் முடிவடையும்.