‘இராவண கோட்டம்’ இசை வெளியீடு துபாயில் நடக்க என்ன காரணம்?

துபாயை அடிப்படையாகக் கொண்ட KRG குரூப் ஆஃப் கம்பெனிஸ் ஷாந்தனு பாக்யராஜ் மற்றும் ஆனந்தி நடித்திருக்கும் ‘இராவண கோட்டம்’ மூலம் பொழுதுபோக்கு துறையில் இறங்குகிறது. இந்தப் படத்தின் இசை வெளியீடு துபாயில் நடைபெறுவதற்கான காரணத்தைப் பற்றி தயாரிப்பாளர் கண்ணன் ரவி பகிரும்போது, ‘துபாயில் பெரிய ஸ்டார்களின், பெரிய படங்களின் இசை வெளியீட்டு விழாவை தமிழ் சினிமா ரசிகர்கள் பார்த்திருக்கிறார்கள். அதேபோல இப்போது, எனது முதல் தயாரிப்பான ‘இராவண கோட்டம்’ படத்தின் இசை வெளியீட்டு விழா தி இந்தியன் ஹை ஸ்கூல், ஓத் மேத்தா, ஷேக் ரஷித் ஆடிட்டோரியத்தில் மார்ச் 18 மாலை 6 மணிக்கு நடைபெறவுள்ளது.

இந்த நிகழ்வு ஒரு பிரமாண்டமான நிகழ்வாக நடைபெறுவதை உறுதிசெய்ய எல்லாவிதமான முயற்சிகளையும் எடுத்துள்ளது’ எனக் கூறியுள்ளார்.

நடிகர் ஷாந்தனு பாக்யராஜ் நடிப்புத் திறமையை நிரூபிக்கும் வகையிலான வாய்ப்பாக ‘இராவண கோட்டம்’ திரைப்படம் அமையும் எனவும் படக்குழு நம்பிகைத் தெரிவித்துள்ளது.

கார்த்திக் நேதா எழுதிய யாசின் நிசார் மற்றும் வந்தனா சீனிவாசன் பாடியுள்ள படத்தின் முதல் சிங்கிளான ‘அத்தன பேர் மத்தியில’ அதன் மெல்லிசை ட்யூன் மற்றும் அழகான வரிகளுக்காக இசை ஆர்வலர்களிடமிருந்து மகத்தான வரவேற்பைப் பெற்றது. பாடல் வெளியாகி 48 மணி நேரத்திற்குள் ஒரு மில்லியன் ‘ஆர்கானிக்’ பார்வைகளைக் கடந்துள்ளது.

ஷாந்தனு பாக்யராஜ், பிரபு, ஆனந்தி, இளவரசு ஆகியோர் முன்னணி கதாபாத்திரங்களில் நடிக்கும் இந்தப் படத்தை விக்ரம் சுகுமாரன் இயக்கி இருக்க, கண்ணன் ரவி குழுமத்தின் கண்ணன் ரவி தயாரித்துள்ளார். ஜஷ்டின் பிரபாகரன் படத்திற்கு இசையமைத்து இருக்கிறார்.