காத்து வாக்குல ரெண்டு காதல் பிளாப் ஆகக்கூடாது.. பக்காவா பிளான் போட்ட விக்கி….

நானும் ரவுடிதான் திரைப்படத்திற்கு பின் அதே கூட்டணி ‘காத்துவாக்குல ரெண்டு காதல்’ படத்திற்காக மீண்டும் இணைந்துள்ளது. இப்படத்தை விக்னேஷ் சிவன் இயக்க, மக்கள் செல்வன் விஜய் சேதுபதி, லேடி சூப்பர் ஸ்டார் நயன்தாரா மற்றும் பிரபல நடிகை சமந்தா ஆகியோர் நடித்து வருகின்றனர். இந்த படத்தின் படப்பிடிப்பு சமீபத்தில் முடிவடைந்தது தொழில்நுட்ப பணிகள் தற்போது நடைபெற்று வருகிறது.

சில நாட்களுக்கு முன் இப்படத்தின் போஸ்டர்கள் வெளியானது. இதில் வித்தியாசமாக விஜய்சேதுபதி, நயன்தாரா, சமந்தா என மூவருக்கும் தனித்தனியாக போஸ்டர்கள் உருவாக்கப்பட்டிருந்தது. விஜய் சேதுபதி இப்படத்தில் ராம்போ எனும் வேடத்தில் நடித்துள்ளார்

விக்னேஷ் சிவன் இயக்கத்தில் கடைசியாக வெளியான திரைப்படம் தானா சேர்ந்த கூட்டம். இப்படத்தில் சூர்யா, கீர்த்திசுரேஷ் உள்ளிட்ட பலரும் நடித்திருந்தனர். ஆனால், இப்படம் ஒரு தோல்விப்படமாக அமைந்தது. எனவே, காத்துவாக்குல ரெண்டு காதல் படம் எந்த சூழ்நிலைலும் தோல்வியை சந்தித்துவிடக்கூடாது என கணக்குப்போட்ட விக்னேஷ் சிவன், இப்படத்தை கிறிஸ்துமஸ் பண்டிகைக்கு வெளியிட திட்டமிட்டுள்ளார். டிசம்பர் 25ம் தேதி கிறிஸ்துமஸ் பண்டிகை வருகிறது. எனவே, 23ம் தேதி வியாழக்கிழமையே இப்படம் வெளியாகலாம் என எதிர்பார்க்கப்படுகிறது. ஏனெனில், வியாழன் முதல் ஞாயிறு வரை 4 நாட்களில் நல்ல வசூலை பெறலாம் என அவர் கணக்குப் போடுகிறாராம்.