அஜித்துக்கு முன்னரே பட்டங்களை துறந்த நடிகர்கள் யார் யார் தெரியுமா?

நடிகர் அஜித் கடந்த இரண்டு நாட்களுக்கு முன்னர் திடீரென தன்னை தல என்று அழைக்க வேண்டாம் என்றும் அஜீத், அஜீத்குமார் அல்லது ஏகே என்று அழைத்தால் என்றும் அறிக்கை ஒன்றை வெளியிட்டிருந்தார்.

இந்த அறிவிப்பு அஜித்தின் ரசிகர்கள் மற்றும் ஊடகங்களில் பெரும் பரபரப்பை ஏற்படுத்தியது என்பதும் ஒருசில ஊடகங்கள் இது குறித்து விவாதம் செய்யும் அளவுக்கு இந்த விஷயம் பெரிதானது என்பதும் குறிப்பிடத்தக்கது.

இந்த நிலையில் அஜித்துக்கு முன்னரே ஒரு சிலர் தங்களுக்கு கிடைத்த பட்டங்களை துறந்து உள்ளார்கள் என்பது குறிப்பிடத்தக்கது. நடிகர் சூர்யா கடந்த சில ஆண்டுகளுக்கு முன் ’நடிப்பின் நாயகன்’ என்ற பட்ட பெயரை தனது திரைப்படங்களில் பயன்படுத்தி வந்தார். ஆனால் அவர் திடீரென அந்தப் பட்ட பெயர் தனக்கு வேண்டாம் என்று அறிவித்துவிட்டார். இதனை அடுத்து தற்போது அவரது படங்களில் சூர்யா என்று மட்டுமே குறிப்பிடப்பட்டு வருகிறது.

அதே போல் நடிகர் விஷால் ’புரட்சி தளபதி’ என்ற பட்டத்தை சில படங்களுக்கு பயன்படுத்தினார். அதன் பின்னர் ஒருசில படங்களை தொடர்ந்து தற்போது விஷால் என்று மட்டுமே அவரது படத்திற்கு விளம்பரம் செய்யப்பட்டு வருகின்றது.

அதேபோல் சூப்பர் ஸ்டார் ரஜினியின் மருமகனான தனுஷ், ‘இளைய சூப்பர் ஸ்டார்’ என ரசிகர்களால் அழைக்கப்பட்டார். இதுகுறித்த போஸ்டர்களும் வெளியானது. ஆனால் தனுஷ் கண்டிப்பாக தனது ரசிகர்களிடம் சூப்பர் ஸ்டார் என்றால் அது ஒரே ஒருவர் மட்டுமே அந்த பெயரை தனக்கு பயன்படுத்த வேண்டாம் என்று கேட்டுக் கொண்டார்.

மேலும் ஜெயம் ரவி ஒரு சில திரைப்படங்களில் ’இளம்புயல்’ என்ற பட்ட பெயரை பயன்படுத்தினார். அதன் பின்னர் அவரும் அந்த பெயரை தற்போது பயன்படுத்தவில்லை என்பது குறிப்பிடத்தக்கது.