“இன்னும் மிடில் கிளாஸ் தான்…” – பத்ம பூஷன் விருதுக்குப் பிறகு நெகிழ்ச்சியுடன் பேசிய அஜித்!

அஜித் குமார் தற்போது தமிழ் சினிமாவில் உச்ச நட்சத்திரமாக விளங்கும் முன்னணி நடிகர். சமீபத்தில் அவர் கலைத்துறையில் தனது பங்களிப்புக்காக மத்திய அரசின் மிக உயரிய விருதான பத்ம பூஷன் விருது பெற்றுள்ளார். இந்த விருதை கடந்த திங்கட்கிழமை டெல்லியில் குடியரசுத் தலைவர் திரௌபதி முர்மு வழங்கினார். இதையடுத்து, ஆங்கில ஊடகமான இந்தியா டுடேவுக்கு அளித்த நேர்காணலில், அஜித் தனது வாழ்க்கையைப் பற்றியும், தனது பார்வை மற்றும் நம்பிக்கைகளைப் பற்றியும் நெகிழ்ச்சியுடன் பகிர்ந்துள்ளார்.

அவரது பேட்டியில் முக்கியமாக கவனம் பெற்றது, “நான் இன்னும் மிடில் கிளாஸ் குடும்பத்தைச் சேர்ந்தவன் என்றே உணர்கிறேன்” என்ற கூற்றாகும். “பத்ம பூஷன் விருது கிடைத்தது இன்னும் நம்ப முடியவில்லை. இது போன்ற தருணங்கள் தான் நம்மை மேலும் ஊக்குவிக்கின்றன. என்னுடைய சாதனைகள் உண்மையிலேயே மகிழ்ச்சி அளிக்கின்றன” என்றும் அவர் தெரிவித்தார். மேலும், தல என்ற பட்டத்தை நிராகரித்து, “எனக்கு பட்டங்கள் வேண்டாம். என்னை அஜித் அல்லது ஏகே எனவே அழைக்க விரும்புகிறேன். நடிகர் என்பது என் வேலை மட்டுமே. இதற்கு சம்பளமும், புகழும் சேர்கிறது. ஆனால் நான் எளிமையாகவே வாழ விரும்புகிறேன்” என்றார்.

அதிக நெகிழ்ச்சியை ஏற்படுத்தியது அவரது மனைவி ஷாலினியைப் பற்றிய பகிர்வாகும். “திருமணத்திற்கு முன் ஷாலினி மிகவும் பிரபலமான நடிகை. ஆனால் திருமணத்துக்குப் பிறகு, எனக்காக தனது நடிப்பு வாழ்க்கையை விட்டுவிட்டு, என் பயணத்தில் ஒவ்வொரு கட்டத்திலும் உறுதுணையாக இருந்துள்ளார். சில நேரங்களில் என் முடிவுகள் தவறு இருந்தபோதும், அவர் மனம் தளராமல் என் பக்கம் இருந்தார். எனது வெற்றிக்கு அவருடைய பங்களிப்பே மிக முக்கியம்” என புகழ்ந்து கூறினார்.

மொத்தமாக, பத்ம பூஷன் விருது பெற்ற பிறகு அஜித் அளித்த பேட்டி, அவருடைய எளிமையும், பணிவும், குடும்பத்தில் வைத்திருக்கும் மதிப்பும் பிரதிபலிக்கிறது. அவரது மனமுள்ள பதில்கள், ரசிகர்களிடையே மேலும் ஒரு பரவலான அன்பையும் மரியாதையையும் உருவாக்கியுள்ளது.