யோகிபாபுவிடம் வேண்டுகோள் விடுத்த வீரப்பன் குடும்பத்தினர்!

சந்தன கடத்தல் வீரப்பன் குடும்பத்தினர் நடிகர் யோகிபாபுவுக்கு வேண்டுகோள் ஒன்றை விடுத்ததாகவும் அந்த வேண்டுகோளுக்கு யோகிபாபு ஒப்புக் கொண்டதாகவும் செய்திகள் வெளியாகியுள்ளது.

யோகி பாபு நடித்து வரும் படங்களில் ஒன்று ’வீரப்பன் கஜானா’. இந்த படத்தை ராட்சசி இயக்குனர் கௌதம் ராஜ் என்பவர் மற்றும் பிரபாவதி சாம்ஸ் என்பவர் ஆகியோர் இணைந்து இயக்கி வருகின்றனர். இந்த படத்தில் யோகிபாபு யூடியூபராக நடிக்கிறார் என்றும் அவருடன் மொட்டை ராஜேந்திரன் மீண்டும் இணைந்துள்ளார் என்பது குறிப்பிடத்தக்கது.

’வீரப்பன் கஜானா’ என்ற டைட்டில் இந்த படத்திற்கு வைக்கப்பட்டிருந்தாலும் இந்த படத்தின் கதைக்கும் வீரப்பனுக்கும் எந்தவித சம்பந்தமும் இல்லை என்றும் படக்குழுவினர் தெரிவித்துள்ளனர். சிறுவர்களை முழுக்க முழுக்க கவரும் வகையில் இந்த படம் உருவாக்கப்பட்டு வருவதாகவும், ஆரம்பம் முதல் கடைசி வரை சிரிக்க வைப்பது ஒன்றே தங்களது எண்ணம் என்றும் இந்த படத்தின் குழுவினர் தெரிவித்துள்ளனர்.

இந்த நிலையில் வீரப்பன் குடும்பத்தினர் யோகிபாபுவின் ’வீரப்பன் கஜானா’ படக்குழுவினரை அணுகி வீரப்பன் என்ற பெயரை பயன்படுத்த வேண்டாம் என்று வேண்டுகோள் விடுத்ததாகவும் அந்த வேண்டுகோளை ஏற்றுக்கொண்டு டைட்டிலை மாற்ற படக்குழுவினர் முடிவு செய்துள்ளதாகவும், இந்த படத்தின் புதிய டைட்டில் விரைவில் அதிகாரபூர்வமாக அறிவிக்கப்படும் என்றும் கூறப்படுகிறது.

ஃபோர்ஸ்கொயர் ஸ்டுடியோஸ் என்ற நிறுவனம் தயாரிப்பில் உருவாகி வரும் இந்தப் படத்தில் யோகிபாபு, ராஜேஷ், பூஜா, ஜீவிதா, மொட்டை ராஜேந்திரன் உள்பட பலர் நடிக்கின்றனர். இந்த படத்தின் படப்பிடிப்பு ஒரே கட்டமாக முடிக்க படக்குழுவினர் முடிவு செய்துள்ளதால் விறுவிறுப்பாக நடைபெற்று வருகிறது.