ரேஷன் கார்டு வகை மாற்றம் குறித்த முக்கிய அறிவிப்பு – ஆன்லைனில் விண்ணப்பிக்கும் முறைகள் வெளியீடு!

தமிழ்நாடு அரசு ரேஷன் கார்டு வைத்திருப்பவர்களுக்கு ஒரு முக்கிய அறிவிப்பை வெளியிட்டுள்ளது. தற்போது, மாநிலத்தில் மொத்தம் 5 வகையான குடும்ப அட்டைகள் செயல்பாட்டில் உள்ளன:

1. முன்னுரிமையற்ற குடும்ப அட்டை (NPHH),

2. முன்னுரிமை குடும்ப அட்டை (PHH),

3. சர்க்கரை விருப்ப அட்டை,

4. அந்தியோதயா அன்ன யோஜனா அட்டை (AAY),

5. பொருளில்லா அட்டை (NPHH-NC).

குடும்பத்தின் பொருளாதார நிலையைப் பொறுத்தே இந்த அட்டை வகைகள் வழங்கப்படுகின்றன. இதில் பொருளில்லா அட்டை (NPHH-NC) வைத்திருப்பவர்கள் நியாய விலைக் கடைகளில் எந்தப் பொருளையும் பெற முடியாது.

திருவள்ளூர் மாவட்ட ஆட்சித்தலைவர் வெளியிட்ட அறிவிப்பில், நியாய விலைக் கடைகளில் அத்தியாவசியப் பொருட்கள் வாங்காமல் இருப்பவர்கள் தங்கள் உரிமையை விட்டுக்கொடுக்க முடியும் என தெரிவிக்கப்பட்டுள்ளது. அதற்காக www.tnpds.gov.in என்ற அதிகாரப்பூர்வ இணையதளத்தின் மூலம் தங்களது குடும்ப அட்டையை பொருளில்லா குடும்ப அட்டையாக (NPHH-NC) மாற்றிக் கொள்ளலாம்.

மேலும், முன்னுரிமை அட்டை, அரிசி அட்டை, சர்க்கரை விருப்ப அட்டை உள்ளிட்ட எந்த வகை கார்டாக வேண்டுமானாலும் ஆன்லைனில் மாற்றிக்கொள்ளும் வசதி வழங்கப்பட்டுள்ளது.

ஆன்லைனுக்கு மாற்றாக, தாலுகா அலுவலகம் அல்லது மாவட்ட ஆட்சியர் தலைமையில் நடைபெறும் பொதுவிநியோக குறைதீர்ப்பு முகாம்களில் நேரடியாக மனு அளித்து ரேஷன் கார்டு வகையை மாற்றிக்கொள்ளலாம்.

இந்த முயற்சியின் மூலம் மக்கள் தங்களது தேவைக்கு ஏற்ப ரேஷன் கார்டு வகையைத் தேர்ந்தெடுத்து, தேவையற்ற சலுகைகளைத் தவிர்க்க முடியும் என அரசு தெரிவித்துள்ளது.