8வது ஊதியக்குழு: மத்திய அரசு ஊழியர்கள் சம்பளம் எவ்வளவு உயரும்? முழு விவரம் இதோ!

8வது ஊதியக்குழு பற்றி மத்திய அரசு ஊழியர்களும் ஓய்வூதியதாரர்களும் எதிர்பார்ப்பு அதிகரித்து கொண்டிருக்கிறது. 10 ஆண்டுகளுக்கு ஒரு முறை புதிய சம்பளக் குழு உருவாகும் நடைமுறைக்கேற்ப, 2026 ஜனவரியில் புதிய 8வது ஊதியக்குழு அமலுக்கு வரும் என எதிர்பார்க்கப்படுகிறது.

மத்திய அரசு 2025 ஜனவரி 16ஆம் தேதி 8வது ஊதியக்குழு அமைப்பதை அங்கீகரித்திருந்தாலும், இதுவரை அதிகாரப்பூர்வமாக குழு அமைக்கப்படவில்லை. அதனால், ஊழியர்கள் மற்றும் ஓய்வூதியதாரர்கள் அடுத்த கட்ட அறிவிப்பிற்காக காத்திருக்கின்றனர்.

7வது ஊதியக்குழுவின் பரிந்துரைகள் இந்த ஆண்டின் (2025) டிசம்பரில் காலாவதியாகின்றன. புதிய ஊதியக்குழு அமலுக்கு வந்தால், ஊழியர்களின் சம்பளம், கொடுப்பனவுகள் மற்றும் ஓய்வூதியத்தில் மாற்றம் ஏற்படும். புதிய ஃபிட்மென்ட் ஃபாக்டர் ஊதிய உயர்வுக்கு முக்கிய காரணியாக இருக்கும்.

7வது ஊதியக்குழுவில் ஃபிட்மென்ட் ஃபாக்டர் 2.57 ஆக இருந்தது. இதன் மூலம் குறைந்தபட்ச சம்பளம் ரூ.7,000 லிருந்து ரூ.18,000 ஆக உயர்ந்தது. 8வது ஊதியக்குழுவில் இது 2.86 ஆக இருக்கலாம் என நிபுணர்கள் கணிக்கின்றனர்.
இதன்படி, லெவல் 1 ஊழியர்களின் அடிப்படை ஊதியம் ரூ.18,000 இருந்து ரூ.51,480 ஆக உயரக்கூடும். ஓய்வூதியமும் ரூ.9,000 முதல் ரூ.25,740 ஆக அதிகரிக்க வாய்ப்புள்ளது.

நிலை-6 ஊழியர்களின் தற்போதைய ரூ.35,400 சம்பளம், புதிய ஊதியக்குழுவின் பரிந்துரைகளின் பேரில் ரூ.1,01,244 ஆகும் என கணிக்கப்படுகிறது. IAS/IPS உள்ளிட்ட நிலை-10 அதிகாரிகளின் சம்பளமும் ரூ.56,100 இருந்து ரூ.1,60,446 ஆக உயரலாம்.

ஆயினும், இவை அனைத்தும் மதிப்பீடுகள் மட்டுமே. அதிகாரப்பூர்வமான 8வது ஊதியக்குழு பரிந்துரைகள் மற்றும் அரசின் ஒப்புதல் கிடைத்த பிறகே சரியான நிலை தெரிய வரும்.