பாஜகவை தூக்கி சுமக்கிறதா அதிமுக?: தம்பிதுரை பதில்!

தமிழகத்தில் மக்களவை தேர்தலை சந்திக்க பாஜக, அதிமுகவுடன் கூட்டணி அமைத்துள்ளது. முன்னதாக அதிமுக-பாஜக கூட்டணி அமைய கூடாது என கடுமையாக விமர்சித்து வந்த தம்பிதுரை தற்போது பாஜகவை பாராட்டி பேசி வருகிறார்.

இந்நிலையில் கரூரில் இன்று செய்தியாளர்களை சந்தித்த தம்பிதுரையிடம், பாஜகவை நாங்கள் தூக்கிச் சுமக்க மாட்டோம் என தம்பிதுரை முன்னர் கூறியதை சுட்டிக்காட்டி கேள்வி எழுப்பப்பட்டது. இதற்கு பதில் அளித்த தம்பிதுரை, நாங்கள்தானே அதிக இடங்களில் போட்டியிட உள்ளோம். இப்போதும் கூறுகிறேன், பாஜகவை வளர்ப்பதற்காக அதிமுகவின் கொள்கைகளை விட்டுக்கொடுக்கவில்லை. அதிமுகவை வைத்து பாஜக தமிழகத்தில் காலூன்ற வேண்டும் என்று நினைத்தபோது அந்தக் கருத்தைக் கூறினேன்.

மேலும், மாநில சுயாட்சி, இலங்கை தமிழர் பிரச்சினை, காவிரி விவகாரம், மத்திய அரசு மாநிலத்தின் அதிகாரங்களை பறிக்கும்போது அதனை எதிர்ப்பது உள்ளிட்ட விவகாரங்களில் விட்டுக்கொடுக்காமல் பாஜகவை விமர்சனம் செய்து பேசிவருகிறோம். இது வேறு, தேர்தல் கால கூட்டணி என்பது வேறு. பொது எதிரியான திமுக-காங்கிரஸை வீழ்த்துவதற்காக கூட்டணி அமைக்கப்பட்டுள்ளது. இது தேர்தலுக்காக அமைக்கப்பட்ட கூட்டணி, இதனால் கொள்கைக்காக ஒன்று சேர்ந்துவிட்டோம் என்பது கிடையாது என புதிய விளக்கம் ஒன்றை அளித்தார்.