“விஜய் முதல்வரானதில் எனக்கு என்ன பொறாமை?” – ரஜினிகாந்த் விளக்கம்

விஜய் தமிழ்நாடு முதல்வராக பதவியேற்ற பிறகு, அவருக்கு ரஜினிகாந்த் வாழ்த்து தெரிவிக்கவில்லை என்றும், விஜய் முதல்வரானதில் ரஜினிகாந்துக்கு பொறாமை இருப்பதாகவும் பல்வேறு செய்திகள் வெளியாகின. மேலும், திமுக – அதிமுக இணைந்து ஆட்சி அமைக்க ரஜினிகாந்த் பேச்சுவார்த்தை நடத்தியதாகவும் தகவல்கள் பரவின.

இந்த விவகாரங்களுக்கு முற்றுப்புள்ளி வைக்கும் வகையில், தனது போயஸ் கார்டன் இல்லத்தில் ரஜினிகாந்த் விளக்கம் அளித்தார்.

அவர் கூறியதாவது:

“தேர்தல் முடிவுகள் வந்ததும் நான் முன்னாள் முதல்வர் மு.க.ஸ்டாலின் அவர்களை நேரில் சென்று சந்தித்தேன். அது விமர்சனத்துக்கு உள்ளானது. அவர் என்னுடைய 40 ஆண்டுகால நண்பர். எங்களுடைய நட்பு அரசியல் கொள்கைகளுக்கு அப்பாற்பட்டது.

ஜனநாயகத்தில் வெற்றி, தோல்வி சகஜம். இருந்தாலும், ஸ்டாலின் கொளத்தூரில் தோல்வியடைந்தது எனக்கு சங்கடமாக இருந்தது. நண்பர் என்ற முறையில் அவரை சந்தித்தேன்.

நான் விஜய் முதல்வராக கூடாது என்பதற்காக ஸ்டாலினை சந்தித்தேன் என்று சிலர் விமர்சித்தனர். அப்படிப்பட்ட தரம் கெட்ட நபர் ரஜினிகாந்த் அல்ல. விஜய் வெற்றி பெற்றதும், எக்ஸ் தளத்தில் நான் வாழ்த்து தெரிவித்தேன். விமான நிலையத்தில் விஜய் குறித்து கேட்கப்பட்ட கேள்விகளுக்கு பதில் சொல்லவில்லை, சிரித்துக்கொண்டே சென்றுவிட்டேன் என்பதையும் சிலர் தவறாக எடுத்துக்கொண்டனர்.

விஜய் மீது எனக்கு பொறாமை என்கிறார்கள். நான் அரசியலில் இல்லாமல் விலகி இருக்கிறேன். அரசியலில் இல்லாத எனக்கு ஏன் விஜய் மீது பொறாமை இருக்க வேண்டும்? ஒருவேளை கமல் ஹாசன் முதல்வராக இருந்திருந்தாலும் கூட எனக்கு பொறாமை இருக்காது.

‘கிடைக்குறது கிடைக்காமல் போகாது; கிடைக்காதது கிடைக்காது’ என்பதில் எனக்கு நம்பிக்கை உண்டு.

எனக்கும் விஜய்க்கும் கிட்டத்தட்ட 25 ஆண்டுகள் தலைமுறை வித்தியாசம் இருக்கிறது. அதனால் தான் ஏற்கனவே சொன்னேன் — விஜய் என்னுடன் போட்டியிட்டால் அது எனக்கும் நல்லதல்ல, அவருக்கும் நல்லதல்ல. சிறுவயதிலிருந்து அவரை பார்த்துக்கொண்டிருக்கிறேன். விஜய் முதல்வரானதில் எனக்கு என்ன பொறாமை?

இளம் வயதிலேயே அவர் முதல்வராகியிருக்கிறார். இரண்டு பெரிய கட்சிகளை எதிர்த்து தனியாக வெற்றி பெற்றிருக்கிறார். அது எனக்கு பொறாமை அல்ல; ஆச்சரியம் கலந்த மகிழ்ச்சி. மக்கள் மத்தியில் விஜய்க்கு மிகுந்த எதிர்பார்ப்பு உள்ளது. அதை அவர் நிறைவேற்றுவார் என்று நம்புகிறேன்.

நான் ஏன் அரசியலுக்கு வரவில்லை என்பதை அப்போது மூன்று பக்க அறிக்கையாக வெளியிட்டிருந்தேன். அரசியல் வேறு, சினிமா வேறு. உடல்நிலை சரியில்லாவிட்டாலும், தயாரிப்பாளர் முதலீட்டை மதித்து நடிக்க வேண்டிய பொறுப்பு இருக்கிறது.

சம்பிரதாயத்திற்காக விஜயை சந்திப்பது எனக்கு பிடிக்காது. மக்கள் விஜய்க்கு இரண்டு ஆண்டுகள் அவகாசம் கொடுக்க வேண்டும். எந்த வித தொந்தரவும் தரக்கூடாது. தவெக தொண்டர்கள் சிறிய தவறு செய்தாலும், அது நேரடியாக விஜயை பாதிக்கும்.

60 ஆண்டுகளுக்குப் பிறகு மக்கள் ஒரு மாற்றத்தை எதிர்பார்த்தனர். அதன் மூலமாக விஜய் முதல்வராகியுள்ளார். நான் இதுவரை எந்த முதல்வர் பதவியேற்பு விழாவிலும் கலந்துகொண்டதில்லை. M. Karunanidhi இருந்த காலத்திலும் கூட நான் பதவியேற்பு விழாவில் கலந்துகொள்ளவில்லை.

நான் அரசியலுக்கு வந்திருந்தால் வெற்றி பெற்றிருப்பேன். அதில் எந்த சந்தேகமும் இல்லை.”

மேலும், “திமுக – அதிமுக இணைந்து ஆட்சி அமைக்க நீங்கள் பேச்சுவார்த்தை நடத்தினீர்களா?” என்ற பத்திரிகையாளர்களின் கேள்விக்கு பதில் அளிக்காமல், ரஜினிகாந்த் செய்தியாளர் சந்திப்பை முடித்துக்கொண்டு வெளியேறினார்.