அஜித் ரசிகர்களுக்கு ட்ரீட்! ஜனவரி 23-ல் மீண்டும் திரையரங்குகளில் ‘மங்காத்தா’ ரீ-ரிலீஸ்!

வெங்கட் பிரபு இயக்கத்தில், நடிகர் அஜித் குமார் நடிப்பில் 2011 ஆம் ஆண்டு வெளியாகி திரையரங்குகளை அதிர வைத்த சூப்பர் ஹிட் திரைப்படம் ‘மங்காத்தா’. வெளியான காலகட்டத்தில் வசூல் சாதனைகளைப் படைத்த இந்த படம், இம்மாதம் மீண்டும் திரையரங்குகளில் வெளியாக உள்ளதாக தயாரிப்பு நிறுவனம் அதிகாரப்பூர்வமாக அறிவித்துள்ளது.

வெங்கட் பிரபு இயக்கிய திரைப்படங்கள் எப்போதும் இளைஞர்களிடையே தனித்த வரவேற்பைப் பெற்றவை. சென்னை 600028, சரோஜா, கோவா, மாநாடு போன்ற படங்களைத் தொடர்ந்து, அவரது திரைப்பயணத்தில் மிகப்பெரிய மைல்கல்லாக அமைந்த படம் ‘மங்காத்தா’. குறிப்பாக, அஜித் குமாருடன் இணைந்த இந்த படம், அவரின் நடிப்புப் பாதையில் ஒரு முக்கிய திருப்புமுனையாக அமைந்தது.

இதுவரை நேர்மையான கதாநாயகனாகவே ரசிகர்களால் பார்க்கப்பட்ட அஜித், ‘மங்காத்தா’வில் வில்லத்தனம் கலந்த நெகட்டிவ் ஷேடு கொண்ட போலீஸ் அதிகாரி கதாபாத்திரத்தில் மிரட்டலான நடிப்பை வெளிப்படுத்தினார். ஒரு தொழிலதிபரின் கணக்கில் வராத பந்தயப் பணத்தை கொள்ளையடிக்கத் திட்டமிடும் ஊழல் நிறைந்த அதிகாரியாக அவர் நடித்த விதம் ரசிகர்களை வியப்பில் ஆழ்த்தியது.

இந்த படத்தின் பாடல்களும், யுவன் சங்கர் ராஜாவின் பின்னணி இசையும் இன்று வரை ரசிகர்களின் ப்ளேலிஸ்டில் இடம் பிடித்துள்ளன. “மங்காத்தா தீம் மியூசிக்” தமிழ் சினிமாவின் ஐகானிக் BGM-களில் ஒன்றாக மாறியது குறிப்பிடத்தக்கது.

படத்தின் வெற்றியைத் தொடர்ந்து, ரசிகர்கள் பல ஆண்டுகளாக ‘மங்காத்தா 2’ குறித்து கேள்வி எழுப்பி வருகின்றனர். வெங்கட் பிரபு பொது நிகழ்ச்சிகளில் பங்கேற்கும் போதெல்லாம், ரசிகர்கள் கேட்கும் முதல் கேள்வியே ‘மங்காத்தா 2 எப்போது?’ என்பதாக உள்ளது.

இந்நிலையில், சமீப காலமாக முன்னணி நடிகர்களின் ஹிட் படங்கள் மீண்டும் திரையரங்குகளில் ரீ-ரிலீஸ் செய்யப்பட்டு, நல்ல வசூலைப் பெற்றுவருகின்றன. விஜயின் கில்லி, ரஜினியின் பாட்ஷா, கமலின் வேட்டையாடு விளையாடு, விஜயகாந்தின் கேப்டன் பிரபாகரன் போன்ற படங்கள் ரீ-ரிலீஸில் சாதனை படைத்த நிலையில், அந்த பட்டியலில் தற்போது ‘மங்காத்தா’வும் இணைந்துள்ளது.

வருகிற ஜனவரி 23 ஆம் தேதி ‘மங்காத்தா’ திரைப்படம் உலகம் முழுவதும் மீண்டும் திரையரங்குகளில் வெளியாக உள்ளது. இந்த ரீ-ரிலீஸ் அறிவிப்பு, அஜித் ரசிகர்களிடையே மிகுந்த உற்சாகத்தை ஏற்படுத்தியுள்ளது.

இந்த படத்தில் அஜித் குமாருடன் அர்ஜுன், திரிஷா, ஆண்ட்ரியா, ராய் லட்சுமி, வைபவ், அஷ்வின், பிரேம்ஜி உள்ளிட்ட பலர் நடித்திருந்தனர். 13 ஆண்டுகளுக்குப் பிறகு மீண்டும் திரையில் மங்காத்தா மேஜிக்கை காண ரசிகர்கள் ஆவலுடன் காத்திருக்கின்றனர்.

Mankatha daa!🔥 The Kingmaker is back to meet you all ♠️ #Mankatha Re-releasing from January 23 in theatres near you!💰#AjithKumar @vp_offl @thisisysr @akarjunofficial @trishtrashers @actor_vaibhav @Premgiamaren @AshwinKakumanu @MahatOfficial @andrea_jeremiah @iamlakshmirai… pic.twitter.com/duMk855DrH

— Sun Pictures (@sunpictures) January 4, 2026