சந்தை சரிவில் ரூ.18,500 கோடி முதலீடு செய்த எல்ஐசி.. டாப் 10 பங்குகளை அள்ளிய வாங்கிய LIC!

பங்குச் சந்தை சரிவை புத்திசாலித்தனமாக பயன்படுத்திக் கொண்ட இந்திய ஆயுள் காப்பீட்டுக் கழகம் (LIC), கடந்த மார்ச் காலாண்டில் சுமார் ரூ.18,500 கோடி மதிப்பிலான பங்குகளை வாங்கி முதலீட்டாளர்களின் கவனத்தை ஈர்த்துள்ளது. சந்தை வீழ்ச்சியால் பல முன்னணி நிறுவனங்களின் பங்குகள் 30 சதவீதம் வரை சரிந்த நிலையில், எல்ஐசி இதை ஒரு சிறந்த முதலீட்டு வாய்ப்பாக மாற்றியுள்ளது.

குறிப்பாக, பஜாஜ் ஃபைனான்ஸ், பார்தி ஏர்டெல், டிசிஎஸ், சிப்லா, ஐஆர்எஃப்சி, இன்ஃபோசிஸ், ஹெச்ஏஎல், எச்சிஎல் டெக், ஹூண்டாய் மோட்டார் மற்றும் மாருதி சுசுகி போன்ற நிறுவனங்களின் பங்குகளை எல்ஐசி அதிகளவில் வாங்கியுள்ளது.

பஜாஜ் ஃபைனான்ஸ் பங்கு விலை 19% சரிந்தபோது, சுமார் ரூ.2,167 கோடி முதலீடு செய்யப்பட்டது. அதேபோல் பார்தி ஏர்டெலில் ரூ.2,153 கோடி மற்றும் டிசிஎஸ் நிறுவனத்தில் ரூ.2,143 கோடி முதலீடு செய்துள்ளது. மேலும் சிப்லாவில் ரூ.2,068 கோடி மற்றும் ஐஆர்எஃப்சியில் ரூ.2,044 கோடி மதிப்பிலான பங்குகள் வாங்கப்பட்டுள்ளன.

இதனுடன், இன்ஃபோசிஸ், ஹெச்ஏஎல், எச்சிஎல் டெக்னாலஜிஸ், ஹூண்டாய் மோட்டார் இந்தியா மற்றும் மாருதி சுசுகி நிறுவனங்களிலும் எல்ஐசி தனது முதலீட்டை அதிகரித்துள்ளது. குறிப்பாக, சந்தை சரிவின்போது தரமான பங்குகளை குறைந்த விலையில் வாங்கும் “Buy the Dip” உத்தியை எல்ஐசி திறமையாக பயன்படுத்தியுள்ளது.

மறுபுறம், எஸ்பிஐ, ஐசிஐசிஐ வங்கி, ஹெச்டிஎஃப்சி வங்கி, கோல் இந்தியா மற்றும் டாடா ஸ்டீல் போன்ற நிறுவனங்களில் இருந்த தனது முதலீட்டின் ஒரு பகுதியை எல்ஐசி குறைத்துள்ளது. குறிப்பாக, எஸ்பிஐ பங்குகளில் இருந்து மட்டும் ரூ.4,626 கோடி மதிப்பிலான முதலீட்டை வெளியே எடுத்துள்ளது.

மார்ச் 31, 2026 நிலவரப்படி எல்ஐசி நிறுவனத்தின் மொத்த முதலீட்டு மதிப்பு ரூ.15.11 லட்சம் கோடியாக உள்ளது. எதிர்காலத்தில் சந்தை மீண்டும் உயரும்போது, இந்த முதலீடுகள் எல்ஐசி நிறுவனத்திற்கு பெரிய லாபத்தை உருவாக்கும் என நிபுணர்கள் மதிப்பிடுகின்றனர்.