வணிகம்
எஸ்பிஐ நிகர லாபம் ரூ.19,684 கோடியாக உயர்வு.. டிவிடெண்ட் அறிவிப்பு வெளியீடு!
இந்தியாவின் மிகப்பெரிய பொதுத்துறை வங்கியான State Bank of India (SBI), 2025-26 நிதியாண்டின் நான்காவது காலாண்டு முடிவுகளை வெளியிட்டுள்ளது. இந்த காலாண்டில் வங்கியின் தனிப்பட்ட நிகர லாபம் ஆண்டுக்கு ஆண்டு அடிப்படையில் 5.6 சதவீதம் உயர்ந்து ரூ.19,684 கோடியாக பதிவாகியுள்ளது. கடந்த ஆண்டு இதே காலத்தில் இது ரூ.18,643 கோடியாக இருந்தது.
எனினும், வட்டி வரம்பு குறைவு மற்றும் செயல்பாட்டு லாபத்தில் ஏற்பட்ட அழுத்தம் காரணமாக சந்தை நிபுணர்கள் எதிர்பார்த்த அளவிற்கு வங்கியின் செயல்திறன் அமையவில்லை. இதன் தாக்கமாக பங்குச்சந்தையில் எஸ்பிஐ பங்கு விலை 5 சதவீதத்திற்கும் அதிகமாக சரிந்தது. பிற்பகல் வர்த்தகத்தில் எஸ்பிஐ பங்கு ரூ.1,037.5 அளவில் வர்த்தகமானது.
வங்கியின் நிகர வட்டி வருமானம் (Net Interest Income – NII), அதாவது வங்கியால் ஈட்டப்பட்ட வட்டிக்கும் செலுத்தப்பட்ட வட்டிக்கும் இடையிலான வித்தியாசம், ஆண்டுக்கு ஆண்டு 4.1 சதவீதம் உயர்ந்து ரூ.44,380 கோடியாக உயர்ந்துள்ளது. முந்தைய ஆண்டில் இது ரூ.42,618 கோடியாக இருந்தது. இருப்பினும் இந்த வளர்ச்சியும் சந்தை எதிர்பார்ப்புகளை எட்டவில்லை.
SBI நிர்வாகக் குழு, 2026 நிதியாண்டிற்காக ஒரு பங்கிற்கு ரூ.17.35 டிவிடெண்ட் வழங்க ஒப்புதல் அளித்துள்ளது. டிவிடெண்ட் பெறுவதற்கான பதிவு தேதி மே 16 என அறிவிக்கப்பட்டுள்ளது. முதலீட்டாளர்களுக்கு இந்த தொகை ஜூன் 4 அன்று வழங்கப்படும் என தெரிவிக்கப்பட்டுள்ளது.
இந்த காலாண்டில் வங்கியின் செயல்பாட்டு லாபம் (Operating Profit before provisions) ரூ.27,704 கோடியாக குறைந்துள்ளது. முந்தைய காலாண்டில் இது ரூ.32,862 கோடியாக இருந்தது. காலாண்டு அடிப்படையில் 16 சதவீதமும், ஆண்டுக்கு ஆண்டு அடிப்படையில் 11 சதவீதமும் சரிவு ஏற்பட்டுள்ளது.
வங்கியின் நிகர வட்டி வரம்பு (NIM) 2.81 சதவீதமாக பதிவாகியுள்ளது. உள்நாட்டு செயல்பாடுகளுக்கான NIM 2.93 சதவீதமாக இருந்தது. இது முந்தைய காலாண்டில் 3.11 சதவீதமாகவும், கடந்த ஆண்டு இதே காலத்தில் 3.14 சதவீதமாகவும் இருந்தது.
வாராக்கடன் நிலைமையில் சிறிய முன்னேற்றமும் ஏற்பட்டுள்ளது. மொத்த வாராக்கடன் விகிதம் (GNPA) 1.57 சதவீதத்திலிருந்து 1.49 சதவீதமாக குறைந்துள்ளது. அதேவேளையில், நிகர வாராக்கடன் விகிதம் 0.39 சதவீதமாக மாற்றமின்றி தொடர்கிறது.
மொத்த வாராக்கடன் தொகை ரூ.73,636.8 கோடியில் இருந்து ரூ.73,452.5 கோடியாக குறைந்திருந்தாலும், நிகர வாராக்கடன் தொகை ரூ.18,012 கோடியில் இருந்து ரூ.18,830 கோடியாக உயர்ந்துள்ளது.
மேலும், இந்த காலாண்டில் வாராக்கடன் ஒதுக்கீடு ரூ.4,458 கோடியில் இருந்து ரூ.5,521 கோடியாக அதிகரித்துள்ளது. FY26 முழு நிதியாண்டிற்கான வாராக்கடன் விகிதம் 0.54 சதவீதமாகவும், கடன் செலவு 0.37 சதவீதமாகவும் உள்ளது.
இதற்கிடையில், எஸ்பிஐ வங்கியின் கடன் வளர்ச்சி ஆண்டுக்கு ஆண்டு 16.87 சதவீதமாக உயர்ந்துள்ளது. வைப்புத் தொகைகள் 11.03 சதவீதம் அதிகரித்துள்ளன. CASA விகிதம் 39.46 சதவீதமாக பதிவாகியுள்ளது.
