EPS ஓய்வூதியதாரர்களுக்கு குட் நியூஸ்: குறைந்தபட்ச மாத ஓய்வூதியம் ₹6,000 ஆக உயர வாய்ப்பு?

இபிஎஸ் (Employees’ Pension Scheme – EPS 95) ஓய்வூதியதாரர்களுக்கு வரவிருக்கும் மாதங்களில் மகிழ்ச்சியான செய்தி கிடைக்கக்கூடும் என தகவல்கள் வெளியாகியுள்ளன. குறைந்தபட்ச மாத EPS ஓய்வூதியம் தற்போதுள்ள ₹1,000-இலிருந்து ₹6,000 ஆக உயர்த்தப்படலாம் என்ற தகவல், தனியார் துறை ஊழியர்கள் மற்றும் ஓய்வூதியதாரர்கள் மத்தியில் பெரும் எதிர்பார்ப்பை உருவாக்கியுள்ளது.

2026 ஆம் ஆண்டு தொடங்கியுள்ள நிலையில், மத்திய அரசு ஊழியர்கள் சம்பளம், ஓய்வூதியம் தொடர்பான பல மாற்றங்களை எதிர்பார்த்துக் கொண்டிருக்க, தனியார் துறை EPF உறுப்பினர்களும் EPS ஓய்வூதியம் மற்றும் வட்டி விகிதம் தொடர்பான அப்டேட்களை உன்னிப்பாக கவனித்து வருகின்றனர். அந்த வகையில், EPS ஓய்வூதிய உயர்வு குறித்த பேச்சு தற்போது பரபரப்பாக பேசப்பட்டு வருகிறது.

ஊடகத் தகவல்களின் படி, EPS-ன் கீழ் வழங்கப்படும் குறைந்தபட்ச ஓய்வூதியத்தை ₹6,000 ஆக உயர்த்துவது குறித்து அரசு மட்டத்தில் தீவிர ஆலோசனைகள் நடைபெற்று வருகின்றன. இருப்பினும், இதுவரை அதிகாரப்பூர்வ அறிவிப்பு எதுவும் வெளியாகவில்லை என்பது குறிப்பிடத்தக்கது.

தற்போது, EPS ஓய்வூதியதாரர்களுக்கு வழங்கப்படும் குறைந்தபட்ச ஓய்வூதியம் வெறும் ₹1,000 மட்டுமே. இந்த தொகை கடைசியாக 2014 ஆம் ஆண்டு திருத்தப்பட்டது. அதன்பிறகு பணவீக்கம், வாழ்க்கைச் செலவுகள், மருத்துவச் செலவுகள் என அனைத்தும் பல மடங்கு உயர்ந்துள்ள நிலையில், EPS ஓய்வூதியம் மட்டும் மாற்றமின்றி இருப்பது கடும் அதிருப்தியை ஏற்படுத்தியுள்ளது.

முன்மொழியப்பட்ட இந்த உயர்வு நடைமுறைக்கு வந்தால், ஓய்வூதியதாரர்களுக்கு மாதம் கூடுதலாக ₹5,000 வருமானம் கிடைக்கும். இது, ஓய்வுக்குப் பிறகு EPS-ஐ மட்டுமே நம்பி வாழும் லட்சக்கணக்கான ஓய்வூதியதாரர்களுக்கு மிகப்பெரிய நிவாரணமாக அமையும்.

தகவல்களின்படி, அடுத்த நிதியாண்டில், குறிப்பாக ஏப்ரல் 2026க்கு அருகில், EPS ஓய்வூதிய உயர்வு குறித்து அரசு முடிவெடுக்கலாம். சிலர் இந்த அறிவிப்பு வரவிருக்கும் மத்திய பட்ஜெட்டிலேயே வெளியாகலாம் என்றும் நம்புகின்றனர்.

தேசிய ஓய்வூதிய திட்டம் (NPS) ஏற்கனவே நடைமுறையில் இருந்தாலும், EPS 95 இன்னும் கோடிக்கணக்கான தனியார் துறை ஊழியர்களின் சமூக பாதுகாப்பு திட்டமாக உள்ளது. பணிக்காலத்தில் EPF-க்கு பங்களித்தவர்கள், ஓய்வுக்குப் பிறகு EPS மூலம் மாதாந்திர ஓய்வூதியம் பெறுகின்றனர்.

மருந்துகள், மளிகைப் பொருட்கள், வீட்டு வாடகை போன்ற அடிப்படை தேவைகளுக்கே தற்போதைய EPS ஓய்வூதியம் போதவில்லை என்பதால், ஓய்வூதிய உயர்வை நீண்ட காலமாக ஊழியர் சங்கங்களும், ஓய்வூதியதாரர்களும் கோரி வருகின்றனர்.

எதிர்பார்த்தபடி EPS குறைந்தபட்ச ஓய்வூதியம் ₹6,000 ஆக உயர்த்தப்பட்டால், அது EPFO ஓய்வூதிய வரலாற்றில் மிகப்பெரிய திருத்தமாக கருதப்படும். இதனால், 2026 ஆம் ஆண்டு தனியார் துறை ஓய்வூதியதாரர்களுக்கு ஒரு முக்கிய திருப்புமுனையாக அமையக்கூடும்.