வணிகம்
EPS ஓய்வூதியம் உயர்வு? ஓய்வுபெற்றோருக்கு பெரிய நம்பிக்கை!
தனியார் துறையில் பணியாற்றிய ஊழியர்களுக்கு மகிழ்ச்சி தரும் செய்தி வெளியாகியுள்ளது. ஊழியர் ஓய்வூதியத் திட்டம் (EPS-95) கீழ் வழங்கப்படும் குறைந்தபட்ச ஓய்வூதியம் விரைவில் உயரக்கூடும் என தகவல்கள் தெரிவிக்கின்றன.
தற்போது, EPS-95 திட்டத்தின் கீழ் குறைந்தபட்ச மாத ஓய்வூதியம் ரூ.1,000 ஆகவும், அதிகபட்சம் ரூ.7,500 ஆகவும் உள்ளது. ஓய்வூதியத் தொகையை ரூ.1,000 லிருந்து ரூ.3,000 அல்லது அதற்கு மேல் உயர்த்த வேண்டும் என்ற கோரிக்கை நீண்ட காலமாக இருந்து வந்தது. இந்நிலையில், தீபாவளி பரிசாக குறைந்தபட்ச ஓய்வூதியம் ரூ.1,000 இலிருந்து ரூ.2,500 ஆக உயர்த்தப்படும் வாய்ப்பு உள்ளது.
இந்த மாற்றம் நடைமுறைக்கு வந்தால், 23 லட்சத்திற்கும் மேற்பட்ட ஓய்வூதியதாரர்கள் பெரிதும் பயனடைவார்கள். பணவீக்கம் மற்றும் அதிகரித்து வரும் வாழ்க்கைச் செலவுகளை சமாளிக்க இது பெரும் நிவாரணமாக இருக்கும்.
மத்திய தொழிலாளர் அமைச்சர் தலைமையில் EPFO மத்திய அறங்காவலர் குழு (CBT) அக்டோபர் 10–11 ஆம் தேதி பெங்களூருவில் கூடவுள்ளது. அந்தக் கூட்டத்தில் குறைந்தபட்ச ஓய்வூதிய உயர்வு உள்ளிட்ட முக்கிய தீர்மானங்கள் எடுக்கப்படலாம் என எதிர்பார்க்கப்படுகிறது.
தொழிற்சங்கங்கள் நீண்ட காலமாக ஓய்வூதியத்தை ரூ.7,000 வரை உயர்த்த கோரியிருந்தாலும், அது சாத்தியமற்றதாகவே கருதப்படுகிறது. இருப்பினும், குறைந்தபட்ச ஓய்வூதியத்தை ரூ.2,500 ஆக உயர்த்தும் வாய்ப்பு மிகுந்துள்ளது.
EPS-95 திட்டம் என்பது ஒரு சமூகப் பாதுகாப்புத் திட்டமாகும். இதில் ஊழியர்களின் சம்பளத்தில் இருந்து 8.33% பங்களிப்பு நிறுவனத்திலிருந்தும், 1.16% அரசாங்க ஆதரவிலிருந்தும் சேர்க்கப்படுகிறது. இதன் மூலம் ஓய்வூதியத் தொகை வழங்கப்படுகிறது.
இந்த உயர்வு நடைமுறைக்கு வந்தால், ஓய்வு பெற்றோரின் ஓய்வூதிய வருமானம் 2.5 மடங்கு அதிகரிக்கும். இது அதிகம் சம்பாதிப்போரை பாதிக்காது என்றாலும், குறைந்தபட்ச ஓய்வூதியத்தில் இருக்கும் மக்களுக்கு பெரிய உதவியாக இருக்கும்.
தற்போது இதுகுறித்து அதிகாரப்பூர்வ அறிவிப்பு வெளியாகவில்லை. ஆனால், CBT கூட்டத்திற்குப் பிறகு EPS ஓய்வூதியம் உயர்வு குறித்து தெளிவான அறிவிப்பு வெளியாகும் என ஓய்வூதியதாரர்கள் நம்பிக்கையுடன் காத்திருக்கின்றனர்.
