மத்திய அரசு ஊழியர்களுக்கு ஜூலையில் DA உயர்வு? அகவிலைப்படி 63% ஆக அதிகரிக்க வாய்ப்பு – சம்பளத்தில் எவ்வளவு கூடும்?

மத்திய அரசு ஊழியர்கள் மற்றும் ஓய்வூதியதாரர்கள் நீண்ட நாட்களாக எதிர்பார்த்து வரும் அகவிலைப்படி (Dearness Allowance – DA) உயர்வு குறித்த முக்கிய தகவல்கள் வெளியாகியுள்ளன. 8-வது ஊதியக் குழுவின் இறுதி பரிந்துரைகள் வெளியாக தாமதமாகக்கூடும் என்பதால், ஜூலை 2026-ல் அகவிலைப்படி உயர்வு அறிவிக்கப்படலாம் என்ற எதிர்பார்ப்பு அதிகரித்துள்ளது.

தற்போது மத்திய அரசு ஊழியர்கள் மற்றும் ஓய்வூதியதாரர்களுக்கான அகவிலைப்படி 60 சதவீதமாக உள்ளது. இந்த நிலையில், பணவீக்கம் மற்றும் நுகர்வோர் விலைக் குறியீட்டு தரவுகளின் அடிப்படையில், அகவிலைப்படி 63 சதவீதமாக உயர வாய்ப்புள்ளதாக தகவல்கள் தெரிவிக்கின்றன.

8-வது ஊதியக் குழுவின் பரிந்துரைகள் காத்திருப்பு

8-வது ஊதியக் குழுவின் நடவடிக்கைகளை லட்சக்கணக்கான ஊழியர்களும் ஓய்வூதியதாரர்களும் கவனித்து வருகின்றனர். ஊழியர் சங்கங்கள், அதிகப்படியான Fitment Factor, குறைந்தபட்ச அடிப்படை ஊதிய உயர்வு மற்றும் அகவிலைப்படியை அடிப்படை ஊதியத்துடன் இணைக்கும் கோரிக்கைகளை முன்வைத்துள்ளன.

இதற்கிடையில், கருத்துகள் மற்றும் பரிந்துரைகளை சமர்ப்பிக்கும் காலக்கெடு ஜூன் 15 வரை நீட்டிக்கப்பட்டுள்ளதால், இறுதி அறிக்கை வெளியாக இன்னும் சில காலம் ஆகலாம் என எதிர்பார்க்கப்படுகிறது.

ஏன் DA உயர்வு எதிர்பார்க்கப்படுகிறது?

மத்திய அரசு ஆண்டுதோறும் ஜனவரி மற்றும் ஜூலை மாதங்களில் அகவிலைப்படியை திருத்துகிறது.

2026 ஜனவரியில் அரசு DA-வை 2 சதவீதம் உயர்த்தியது. தற்போது தொழிலாளர்களுக்கான அகில இந்திய நுகர்வோர் விலைக் குறியீடு (AICPI-IW) உயர்ந்துள்ளதால், ஜூலை மாத உயர்வுக்கான வாய்ப்பு அதிகரித்துள்ளது.

• மார்ச் 2026 AICPI-IW குறியீடு: 149.1
• ஏப்ரல் 2026 AICPI-IW குறியீடு: 149.9

இந்த உயர்வு பணவீக்க அழுத்தம் தொடர்வதை காட்டுகிறது.

DA 63% ஆக உயருமா?

ஏப்ரல் 2026 வரையிலான AICPI-IW தரவுகளின் அடிப்படையில் கணக்கிடப்பட்ட அகவிலைப்படி சுமார் 62.51 சதவீதமாக உள்ளது. இதனை முழு எண்ணாக கணக்கிட்டால் 63 சதவீதமாக அமைகிறது.

இதனால் தற்போது உள்ள 60 சதவீத DA, ஜூலை மாதத்தில் 63 சதவீதமாக உயர வாய்ப்புள்ளதாக நிபுணர்கள் கருதுகின்றனர். அதாவது, 3 சதவீத DA உயர்வு கிடைக்கக்கூடும்.

சம்பளத்தில் எவ்வளவு அதிகரிக்கும்?

ஒரு மத்திய அரசு ஊழியர் மாத அடிப்படை ஊதியமாக ரூ.18,000 பெறுகிறார் என வைத்துக்கொள்வோம்.

இதன்படி, அடிப்படை ஊதியம் ரூ.18,000 பெறும் ஊழியருக்கு மாதந்தோறும் ரூ.540 கூடுதல் வருமானம் கிடைக்கும்.

மத்திய அமைச்சரவையின் ஒப்புதல் அவசியம்

அகவிலைப்படி உயர்வு நடைமுறைக்கு வர மத்திய அமைச்சரவையின் ஒப்புதல் அவசியம். ஜூன் மாதத்தில் நடைபெறும் அமைச்சரவைக் கூட்டங்களில் இதுகுறித்த முன்மொழிவு பரிசீலிக்கப்படலாம் என தகவல்கள் தெரிவிக்கின்றன.

ஊழியர்களுக்கு நிம்மதி தரும் அறிவிப்பு?

8-வது ஊதியக் குழுவின் இறுதி பரிந்துரைகள் தாமதமாகும் சூழலில், ஜூலை மாத DA உயர்வு மத்திய அரசு ஊழியர்கள் மற்றும் ஓய்வூதியதாரர்களுக்கு கூடுதல் நிதி ஆதரவாக அமையக்கூடும். இருப்பினும், அதிகாரப்பூர்வ அறிவிப்பு வெளியாகும் வரை இறுதி முடிவு உறுதியாகவில்லை.