சென்னை நகரத்தில் செல்லப் பிராணி நாய் உரிமம் & மைக்ரோசிப் கால அவகாசம் டிசம்பர் 14 வரை நீட்டிப்பு

சென்னை மாநகராட்சியில் செல்லப் பிராணி நாய்களுக்கு உரிமம் பெறுதல், ரேபிஸ் தடுப்பூசி செலுத்துதல் மற்றும் மைக்ரோசிப் பொருத்துதல் ஆகியவற்றுக்கான கடைசி நாள் தற்போது டிசம்பர் 14 வரை நீட்டிக்கப்பட்டுள்ளது.

முன்னதாக இந்த பணிகளுக்கான கடைசி தேதி டிசம்பர் 7 என அறிவிக்கப்பட்டிருந்தது. ஆனால், சிறப்பு முகாம்களில் மக்களின் அதிக வருகை மற்றும் பெரும் ஆதரவை கருத்தில் கொண்டு, இந்த கால அவகாசம் அதிகாரப்பூர்வமாக நீட்டிக்கப்பட்டுள்ளதாக சென்னை மாநகராட்சி தெரிவித்துள்ளது.

நகரின் பல பகுதிகளில் அமைக்கப்பட்ட சிறப்பு முகாம்களில் ஆயிரக்கணக்கான செல்லப்பிராணி உரிமையாளர்கள் பங்கேற்று வருகின்றனர். குறிப்பாக, ஞாயிற்றுக்கிழமை மட்டும் நடத்தப்பட்ட முகாம்களில், கால்நடை மருத்துவமனைகள் உள்ளிட்ட ஏழு மையங்களில் 956 நாய்களுக்கு ரேபிஸ் தடுப்பூசி, மைக்ரோசிப் பொருத்துதல் மற்றும் உரிமம் வழங்குதல் செய்யப்பட்டன.

இதுவரை சென்னை நகர எல்லைக்குள் 96,056 நாய்களுக்கு உரிமம் வழங்கப்பட்டுள்ளதாக மாநகராட்சி அதிகாரிகள் தெரிவித்துள்ளனர். ரேபிஸ் நோய் பரவலை தடுக்கும் நோக்கிலும், நாய்களின் சரியான அடையாளத்தை உறுதி செய்யும் வகையிலும் இந்த நடவடிக்கை மேற்கொள்ளப்படுவதாகவும் தெரிவித்துள்ளனர்.

மேலும், நாய் உரிமையாளர்கள் அனைவரும் இந்த நீட்டிக்கப்பட்ட அவகாசத்தை பயன்படுத்தி, டிசம்பர் 14க்குள் கட்டாய நடைமுறைகளை நிறைவு செய்யுமாறு அதிகாரிகள் வேண்டுகோள் விடுத்துள்ளனர்.