டிகிரி கூட முடிக்கவில்லை.. 20 வயதில் ரூ.70 லட்சம் சம்பளம் வாங்கும் இந்திய இளைஞர்! எப்படி சாத்தியமானது?

டிகிரி இல்லாமலே ரூ.70 லட்சம் சம்பளம்.. இந்திய இளைஞரின் வெற்றி கதை வைரல்!

இந்தியாவைச் சேர்ந்த 20 வயது இளைஞர் ஒருவர், பட்டப்படிப்பை கூட முடிக்காமல் வருடத்திற்கு ரூ.70 லட்சம் சம்பளம் பெறும் வேலை கிடைத்துள்ளதாக Reddit தளத்தில் பகிர்ந்துள்ள பதிவு தற்போது சமூக வலைதளங்களில் வைரலாகி வருகிறது.

சான் ஃப்ரான்ஸிஸ்கோவில் உள்ள ஒரு ஸ்டார்ட் அப் நிறுவனத்தில் இந்த இளைஞர் உயர்ந்த சம்பளத்தில் பணியில் சேர்ந்திருப்பது பலரையும் ஆச்சரியப்பட வைத்துள்ளது. குறிப்பாக, அவருக்கு கல்லூரி டிகிரி இல்லாததே இந்த வெற்றிக் கதையின் முக்கிய அம்சமாக பார்க்கப்படுகிறது.

16 வயதிலேயே ஃப்ரீலான்சிங் தொடக்கம்

இந்த இளைஞர், தனது 16 வயதிலிருந்தே ஃப்ரீலான்சிங் வேலைகளை செய்து வந்ததாக தெரிவித்துள்ளார். பல்வேறு நிறுவனங்களுக்கு ஒப்பந்த அடிப்படையில் டெக்னாலஜி மற்றும் மார்கெட்டிங் தொடர்பான பணிகளை செய்து கொடுத்துள்ளார்.

Reddit பதிவில் அவர் கூறியதாவது:

“16 வயதிலேயே நான் ஃப்ரீலான்சிங் செய்ய ஆரம்பித்தேன். என்னுடைய எதிர்காலம் எப்படி இருக்கும் என்பது கூட எனக்கு தெரியாது. ஆன்லைனில் கிடைத்த வேலைகளை செய்து கொண்டே இருந்தேன்.”

தொடக்கத்தில் அவர் செய்த பல வேலைகளுக்கு சம்பளம் கிடைக்கவில்லை என்றும், கிடைத்தாலும் மிகவும் குறைவாகவே இருந்ததாகவும் கூறியுள்ளார்.

ஆன்லைனில் கற்ற மார்கெட்டிங் திறமை

கல்லூரி படிப்பு இல்லாவிட்டாலும், மார்கெட்டிங் மற்றும் பிசினஸ் வளர்ச்சி தொடர்பான விஷயங்களை ஆன்லைன் மூலம் கற்றுக் கொண்டதாக அவர் தெரிவித்துள்ளார்.

ஒரு பெரிய நிறுவனத்திற்கு வேலை செய்த அனுபவம் தனது திறமையை மேம்படுத்தியதாகவும், அதுவே தனது வாழ்க்கையை மாற்றிய முக்கிய காரணமாக அமைந்ததாகவும் கூறியுள்ளார்.

சான் ஃப்ரான்ஸிஸ்கோ நிறுவனத்தில் ரூ.70 லட்சம் சம்பளம்

சான் ஃப்ரான்ஸிஸ்கோவில் உள்ள ஒரு ஸ்டார்ட் அப் நிறுவனம் வேலைவாய்ப்பு அறிவிப்பு வெளியிட்டதை பார்த்த இவர், தன்னிடம் தகுதி இல்லை என்று தெரிந்திருந்தும் அதற்கு விண்ணப்பித்துள்ளார்.

முதலில் அந்த நிறுவனம் அவரை நிராகரித்துள்ளது. ஆனால் பின்னர், அந்த நிறுவனத்தின் உரிமையாளரை நேரடியாக தொடர்பு கொண்டு தனது திறமைகளை எடுத்துக்கூறியுள்ளார்.

அதனைத் தொடர்ந்து நடந்த நேர்காணலில் அவர் தேர்வாகி, அதே நாளில் வேலைவாய்ப்பு கடிதமும் கிடைத்ததாக தெரிவித்துள்ளார்.

“தூக்கம் வராத நேரங்களில் கூட கற்றுக்கொண்டேன்”

தனது வெற்றியின் ரகசியம் குறித்து அவர் கூறும்போது:

“எனக்கு தூக்கம் வராத நேரங்களில் கூட ஏதாவது ஒன்றை படித்து கொண்டிருப்பேன். அந்த பழக்கம் தான் இன்று எனக்கு உதவியது.”

என்று தெரிவித்துள்ளார்.

சமூக வலைதளங்களில் பாராட்டு

இந்த இளைஞரின் சாதனையை பார்த்த பலரும் அவருக்கு வாழ்த்து தெரிவித்து வருகின்றனர். சிலர், “தன்னம்பிக்கை மற்றும் தொடர்ந்து கற்றுக்கொள்ளும் மனப்பான்மை இருந்தால் வெற்றி நிச்சயம்” என்று கருத்து பதிவிட்டு வருகின்றனர்.