62 ஆண்டுகளை நிறைவு செய்த கமல்ஹாசன்- ‘விக்ரம்’ படக்குழு வெளியிட்ட போஸ்டர்!

திரைத்துறையில் நடிகர் கமல்ஹாசன் 62 ஆண்டுகளை நிறைவு செய்வதை முன்னிட்டு ‘விக்ரம்’ படக்குழுவினர் போஸ்டர் ஒன்றை வெளியிட்டுள்ளனர்.

நடிகர் கமல்ஹாசன் தற்போது இயக்குநர் லோகேஷ் கனகராஜ் இயக்கத்தில் ‘விக்ரம்’ படத்தில் நடித்து வருகிறார். மிகுந்த எதிர்பார்ப்புகளுக்கு இடையே விக்ரம் படத்தின் படப்பிடிப்பு நடந்து வருகிறது. இந்த சூழலில் இன்று கமல்ஹாசன் திரைத் துறையில் அறிமுகம் ஆகி 62 ஆண்டுகள் நிறைவு அடைந்துள்ளது.

சினிமாவில் கமல்ஹாசனின் 62 ஆண்டுகள் நிறைவை கொண்டாடும் விதத்தில் விக்ரம் படக்குழுவினர் புதிதாக போஸ்டர் ஒன்றை வெளியிட்டுள்ளனர். அந்த போஸ்டரில் ரத்தம் சொட்டும் வாளைக் கையில் ஏந்தியபடி போஸ் கொடுக்கிறார் கமல்ஹாசன். மேலும், ‘சிங்கம் என்றுமே சிங்கம் தான்’ என்பது போன்ற வாசகமும் போஸ்டரில் இடம் பெற்றுள்ளது.

விக்ரம் படத்தில் கமல் ஓய்வு பெற்ற காவல் அதிகாரியாக நடிக்கிறார் எனக் கூறப்படுகிறது. கமல் உடன் நடிகர்கள் விஜய் சேதுபதி, ஃபகத் பாசில், ஆண்ட்ரியா, அர்ஜுன் தாஸ், காளிதாஸ் ஜெயராம் எனப் பெரிய நடிகர்கள் பட்டாளமே நடிக்கிறது என்பது குறிப்பிடத்தக்கது.