பாசிட்டிவ் விமர்சனத்தின் பலம்.. போர் தொழில் படத்துக்கு அதிகரித்த தியேட்டர்கள்.. அப்போ டக்கர்?

அசோக் செல்வன் மற்றும் சரத்குமார் நடிப்பில் உருவாகி உள்ள போர் தொழில் படத்துக்கு மக்கள் மத்தியிலும் விமர்சகர்கள் மத்தியிலும் பாசிட்டிவ் விமர்சனங்கள் குவிந்து வரும் நிலையில், அந்த படத்திற்கான காட்சிகள் அனைத்து திரையரங்குகளிலும் அதிகரிக்கப்பட்டுள்ளதாக அட்டகாசமான தகவல்கள் வெளியாகி உள்ளன.

அசோக் செல்வனின் போர் தொழில் படம் நன்றாக இருந்தாலும், அவர் பாக்ஸ் ஆபிஸில் கல்லா கட்டுவாரா? என்கிற கேள்வி எழுந்து வந்த நிலையில், நல்ல படத்துக்கு ரசிகர்களின் சப்போர்ட் எப்பவுமே இருக்கும் என்றும் படத்தை மோசமாக எடுத்து விட்டு பார்க்க சொல்லி ரசிகர்களை கட்டாயப்படுத்துவதால் தான் பல படங்கள் தோல்வியைத் தழுவுகின்றன என நெட்டிசன்கள் விளாசி வருகின்றனர்.

வாரத்துக்கு 6 படங்கள் குப்பையாக கடந்த 6 மாத காலமாக வெளியாகி வரும் நிலையில், இதுவரை 6 சூப்பர் படங்கள் கூட வெளியாகவில்லை. இதனால் தான் ரசிகர்கள் தியேட்டருக்கு வருவதை குறைத்து விட்டு ஓடிடியிலேயே அந்த உப்புமா படங்களை நேரத்தை போக்குவதற்காக ஒரு முறை பார்த்து அங்கேயும் கழுவி ஊற்றுகின்றனர் என்கின்றனர்.

அறிமுக இயக்குநர் விக்னேஷ் ராஜா தனது முழு திறமையையும் பயன்படுத்தி இந்த படத்தை மக்கள் அனைவரும் பார்த்து ரசிக்க வேண்டும் என்ற நோக்கத்துடன் எடுத்துள்ள நிலையில், தான் தற்போது அந்த படத்திற்கான வரவேற்பு அதிகரித்து இருப்பதாக கூறுகின்றனர்.

அதே நேரம் இந்த வாரம் வெளியான சித்தார்த்தின் டக்கர் படம் பெயரில் மட்டும் தான் டக்கராக இருப்பதாகவும் படம் சரியான மக்கராக உள்ளதாக கழுவி ஊற்றி வருகின்றனர்.