புதிய கார்கள் மற்றும் இருசக்கர வாகனங்களுக்கு மூன்றாம் தரப்பு இன்சூரன்ஸ் காலம் நீட்டிப்பு? – உச்சநீதிமன்றத்தின் முக்கிய உத்தரவு

புதுடெல்லி: புதிய கார்கள் மற்றும் இருசக்கர வாகனங்களுக்கான கட்டாய மூன்றாம் தரப்பு (Third-Party) மோட்டார் இன்சூரன்ஸ் காலத்தை நீட்டிக்க வேண்டும் என்று உச்சநீதிமன்றம் முக்கிய உத்தரவு பிறப்பித்துள்ளது.

இந்த உத்தரவின்படி, புதிய கார்கள் வாங்குபவர்களுக்கு தற்போது நடைமுறையில் உள்ள 3 ஆண்டுகள் கட்டாய மூன்றாம் தரப்பு இன்சூரன்ஸ் காலத்தை 4 ஆண்டுகளாக உயர்த்துமாறு இந்திய காப்பீட்டு ஒழுங்குமுறை மற்றும் மேம்பாட்டு ஆணையத்திற்கு (IRDAI) நீதிமன்றம் அறிவுறுத்தியுள்ளது.

அதேபோல், புதிய இருசக்கர வாகனங்களுக்கு தற்போது கட்டாயமாக வழங்கப்படும் 5 ஆண்டுகள் மூன்றாம் தரப்பு இன்சூரன்ஸ் காலத்தை 6 ஆண்டுகளாக நீட்டிக்கவும் பரிந்துரைக்கப்பட்டுள்ளது.

நாட்டில் கட்டாய இன்சூரன்ஸ் விதி அமலில் இருந்தாலும், ஏராளமான வாகனங்கள் இன்னும் செல்லுபடியாகும் காப்பீடு இல்லாமல் இயக்கப்படுவதாக நீதிமன்றம் கவலை தெரிவித்துள்ளது. இதனால் சாலை விபத்துகளின் போது பாதிக்கப்பட்டவர்களுக்கு உரிய இழப்பீடு கிடைப்பதில் சிக்கல்கள் ஏற்படுகின்றன.

இந்த மாற்றத்தின் மூலம், அதிகமான வாகனங்கள் நீண்ட காலத்திற்கு இன்சூரன்ஸ் பாதுகாப்பில் இருக்கும் என்றும், சாலை விபத்துகளால் பாதிக்கப்படுபவர்களுக்கு விரைவான இழப்பீடு கிடைக்க வழிவகுக்கும் என்றும் எதிர்பார்க்கப்படுகிறது.

இந்த பரிந்துரையை செயல்படுத்துவது தொடர்பாக இந்திய காப்பீட்டு ஒழுங்குமுறை மற்றும் மேம்பாட்டு ஆணையம் (IRDAI) தேவையான நடவடிக்கைகளை மேற்கொள்ளும் என தெரிவிக்கப்பட்டுள்ளது. புதிய விதிமுறைகள் அமலுக்கு வரும் தேதி குறித்து அதிகாரப்பூர்வ அறிவிப்பு பின்னர் வெளியாகும்.