2 மில்லியன் பார்வைகளை கடந்த ராட்சசி டிரைலர்!

அரசு பள்ளி மாணவர்களை மையமாக வைத்து அதிக அளவில் தமிழ் சினிமாவில் படங்கள் வரவில்லை என்றே சொல்லலாம். சில படங்களில் அரசு பள்ளிகள் குறித்து ஒரு சில காட்சிகள் வந்துள்ளன. முழுக்க முழுக்க அரசு பள்ளியை மையமாக வைத்து எடுக்கப்பட்டுள்ள ஜோதிகாவின் ராட்சசி டிரைலர் வெளியாகி ஒரே நாளில் 20 லட்சம் பார்வைகளை கடந்து வைரலாகி வருகிறது.

இயக்குநர் கெளதம் ராஜ் இயக்கத்தில் ஜோதிகா முதன்மை கதாபாத்திரத்தில் நடித்துள்ள ராட்சசி படத்தின் டிரைலர் வெளியாகி பலரது பாராட்டுக்களை பெற்றுள்ளது. நாச்சியார் படத்திற்கு பிறகு மிகுந்த போல்டான அரசு பள்ளி ஆசிரியை கதாபாத்திரத்தில் ராட்சச நடிப்பை வெளிப்படுத்தியுள்ளார் ஜோதிகா. ஷான் ரோல்டன் இசையில் வரும் பின்னணி இசை படத்திற்கு பக்க பலமாய் அமையும் என எதிர்பார்க்கப்படுகிறது.

ட்ரீம் வாரியர்ஸ் தயாரிப்பில் சூர்யாவின் என்ஜிகே வெளியாகி கலவையான விமர்சனங்களுக்கு இடையே வசூல் ஈட்டி வரும் நிலையில், சூர்யாவின் மனைவி ஜோதிகாவின் படத்தையும் ட்ரீம் வாரியர்ஸ் தயாரித்துள்ளது குறிப்பிடத்தக்கது.