வணிகம்
ஹரியானா அரசு ஊழியர்களுக்கு தீபாவளி பரிசு – அகவிலைப்படி 3% உயர்வு அறிவிப்பு!
DA Hike – ஹரியானா அரசு ஊழியர்கள், ஓய்வூதியதாரர்களுக்கு தீபாவளி மகிழ்ச்சி!
தீபாவளி பண்டிகையை முன்னிட்டு, ஹரியானா அரசு தனது ஊழியர்கள் மற்றும் ஓய்வூதியதாரர்களுக்கு மகிழ்ச்சியான செய்தியை அறிவித்துள்ளது. மாநில அரசு அகவிலைப்படி (DA) மற்றும் அகவிலைப்படி நிவாரணத்தை (DR) 3 சதவீதம் உயர்த்தியுள்ளது.
இதன் மூலம், தற்போதைய 55 சதவீத அகவிலைப்படி 58 சதவீதமாக உயர்ந்துள்ளது. இந்த உயர்வு 2025 ஜூலை 1ஆம் தேதி முதல் அமலுக்கு வரும் என்றும், அக்டோபர் மாத ஊதியத்திலும் ஓய்வூதியத்திலும் இதன் தாக்கம் காணப்படும் என தெரிவிக்கப்பட்டுள்ளது.
ஹரியானா முதலமைச்சர் நயாப் சிங் சைனி தலைமையிலான அரசு இந்த முடிவை எடுத்துள்ளது. இதனால் சுமார் 6 லட்சம் பேர் – அதாவது 3 லட்சம் அரசு ஊழியர்கள் மற்றும் 3 லட்சம் ஓய்வூதியதாரர்கள் – இந்த உயர்வால் பயன்பெறவுள்ளனர்.
நிதித்துறை வெளியிட்ட அறிவிப்பின் படி, ஜூலை முதல் செப்டம்பர் வரை நிலுவையில் உள்ள அகவிலைப்படி தொகை நவம்பர் மாதத்தில் அரியராக வழங்கப்படும்.
முன்னதாக மத்திய அரசு, 7வது ஊதியக் குழுவின் பரிந்துரையின்படி, மத்திய அரசு ஊழியர்கள் மற்றும் ஓய்வூதியதாரர்களுக்கு 3% DA உயர்வு வழங்கியிருந்தது. அதனைப் போல், ஹரியானா அரசு தற்போது அதே அளவில் உயர்வை அறிவித்துள்ளது.
