EPS 2026: EPF உறுப்பினர்களுக்கு புதிய ஓய்வூதிய விதிகள்.. தெரிந்துகொள்ள வேண்டிய 10 முக்கிய அம்சங்கள்

ஊழியர்களின் ஓய்வூதிய நிர்வாகத்தை மேலும் வெளிப்படையாகவும், விரைவாகவும் மாற்றும் நோக்கில் ஊழியர் ஓய்வூதியத் திட்டம் (Employees’ Pension Scheme – EPS) 2026 அறிமுகப்படுத்தப்பட்டுள்ளது. இந்த புதிய திட்டம், ஓய்வூதியத் தொகை அல்லது தகுதிகளில் பெரிய மாற்றங்களை கொண்டுவரவில்லை என்றாலும், சேவை வழங்கல், கோரிக்கை பரிசீலனை மற்றும் நிர்வாக நடைமுறைகளில் பல முக்கிய மாற்றங்களை அறிமுகப்படுத்துகிறது.

புதிய EPS 2026, சமூகப் பாதுகாப்புச் சட்டம், 2020 (Code on Social Security, 2020)-ன் கீழ் செயல்படுகிறது. இதன் மூலம் தற்போதுள்ள EPS-1995 திட்டம் புதிய சட்டக் கட்டமைப்புடன் ஒருங்கிணைக்கப்படுகிறது. ஏற்கனவே EPS-ல் உள்ள உறுப்பினர்களின் உரிமைகள் மற்றும் பலன்கள் தொடரும் என்பதும் குறிப்பிடத்தக்கது.

EPS 2026 – முக்கிய அம்சங்கள்

1. புதிய சட்டக் கட்டமைப்பு

EPS 2026, சமூகப் பாதுகாப்புச் சட்டம் 2020-ன் கீழ் செயல்படும் புதிய நிர்வாக அமைப்பாகும். இது பழைய EPS-1995 திட்டத்தை சட்ட ரீதியாக மேம்படுத்துகிறது. இருப்பினும், தற்போதைய உறுப்பினர்களின் ஓய்வூதிய உரிமைகளில் மாற்றம் ஏற்படாது.

2. தற்போதைய உறுப்பினர்களின் உரிமைகள் பாதுகாப்பு

EPS-1995 திட்டத்தில் ஏற்கனவே இணைந்துள்ள ஊழியர்கள் இதுவரை பெற்ற அனைத்து ஓய்வூதிய பலன்களையும் தொடர்ந்து பெறுவார்கள். புதிய திட்டம் காரணமாக எந்த உரிமையும் பறிக்கப்படாது.

3. உறுப்பினர் தகுதியில் தெளிவான விதிகள்

புதிய திட்டத்தில் உறுப்பினர் தகுதி, சேவை காலம், உறுப்பினர் தொடங்கும் மற்றும் முடியும் காலம் உள்ளிட்ட பல அம்சங்கள் தெளிவாக வரையறுக்கப்பட்டுள்ளன. இதனால் தேவையற்ற குழப்பங்கள் குறையும்.

4. 20 நாட்களுக்குள் ஓய்வூதியக் கோரிக்கை தீர்வு

முழுமையான ஆவணங்களுடன் சமர்ப்பிக்கப்படும் ஓய்வூதியக் கோரிக்கைகள் 20 நாட்களுக்குள் பரிசீலித்து முடிக்கப்பட வேண்டும் என்ற புதிய காலக்கெடு அறிமுகப்படுத்தப்பட்டுள்ளது.

5. தாமதமானால் 12% வட்டி

நியாயமான காரணமின்றி ஓய்வூதியக் கோரிக்கைகள் 20 நாட்களைத் தாண்டி தாமதமானால், தாமத காலத்திற்கு ஆண்டுக்கு 12% வட்டி வழங்கப்பட வேண்டும். இந்த தொகை சம்பந்தப்பட்ட அதிகாரியின் பொறுப்பின் கீழ் வசூலிக்கப்படும் வகையில் விதிகள் வகுக்கப்பட்டுள்ளன.

6. PF பங்களிப்பு விகிதத்தில் மாற்றமில்லை

நிறுவனம் தொடர்ந்து ஊதியத்தின் 8.33%-ஐ EPS நிதிக்காக செலுத்தும். ஊழியர்கள் EPS-க்கு தனியாக எந்த தொகையும் செலுத்த வேண்டியதில்லை. தற்போதைய பங்களிப்பு முறை அப்படியே தொடர்கிறது.

7. ஓய்வூதியக் கணக்கீட்டு முறை தொடரும்

ஓய்வூதியத்தை கணக்கிடும் தற்போதைய நடைமுறையில் மாற்றம் இல்லை. ஓய்வூதியத்திற்குரிய சம்பளம் மற்றும் சேவை காலத்தை அடிப்படையாகக் கொண்ட தற்போதைய சூத்திரமே தொடரும்.

8. குறைந்தபட்ச ஓய்வூதியம் மாற்றமில்லை

பலர் எதிர்பார்த்தபோதிலும், குறைந்தபட்ச மாதாந்திர ஓய்வூதிய தொகையான ரூ.1,000-ல் எந்த உயர்வும் அறிவிக்கப்படவில்லை.

9. குடும்ப ஓய்வூதிய பலன்கள் தொடரும்

விதவை ஓய்வூதியம், குழந்தைகள் ஓய்வூதியம், அனாதை ஓய்வூதியம் மற்றும் மாற்றுத்திறனாளிகளுக்கான ஓய்வூதிய திட்டங்கள் அனைத்தும் முந்தையபடி தொடரும்.

10. நிர்வாகத்தில் அதிக வெளிப்படைத்தன்மை

ஓய்வூதிய நிதி நிர்வாகம், பதிவேடுகள் பராமரிப்பு, முதலீட்டு நடைமுறைகள் மற்றும் டிஜிட்டல் சேவை தரநிலைகளில் அதிக வெளிப்படைத்தன்மையை உறுதி செய்யும் வகையில் EPS 2026 வடிவமைக்கப்பட்டுள்ளது.

EPS 2026 – ஊழியர்களுக்கு என்ன பலன்?

புதிய திட்டம் ஓய்வூதியத் தொகையை உயர்த்தவில்லை என்றாலும், கிளெய்ம் விரைவாக பரிசீலிக்கப்படுதல், காலக்கெடு நிர்ணயம், தாமதத்திற்கு பொறுப்புக்கூறல் மற்றும் வெளிப்படையான நிர்வாகம் போன்ற பல அம்சங்கள் மூலம் EPF உறுப்பினர்களுக்கு சிறந்த சேவையை வழங்கும் நோக்கத்துடன் அறிமுகப்படுத்தப்பட்டுள்ளது.