தினமும் இந்த 7 சூப்பர் உணவுகள் சாப்பிட்டால் என்ன ஆகும்? இதயம் முதல் மூளை வரை பாதுகாக்கும் அசத்தல் நன்மைகள்!

நாம் அன்றாடம் சாப்பிடும் சில சாதாரண உணவுகள் உடலுக்கு பெரிய அளவில் ஆரோக்கிய நன்மைகளை வழங்கக்கூடியவை என புதிய ஊட்டச்சத்து ஆய்வுகள் தெரிவிக்கின்றன. உலகம் முழுவதும் ஆய்வு செய்யப்பட்ட பல ஆயிரம் உணவுப் பொருட்களில் இருந்து, உடல்நலத்தை மேம்படுத்தும் முக்கிய “சூப்பர் ஃபுட்ஸ்” பட்டியலில் பாதாம், பசலைக்கீரை, நீர்க்கடுகுக் கீரை, பீட்ரூட் கீரை, சியா விதைகள், பூசணி விதைகள் மற்றும் டேன்டேலியன் கீரை ஆகியவை முன்னிலை பெற்றுள்ளன.

பாதாமில் மோனோஅன்சாச்சுரேட்டட் கொழுப்பு, வைட்டமின் E மற்றும் நார்ச்சத்து அதிகமாக இருப்பதால் இதய ஆரோக்கியத்தை பாதுகாக்க உதவுகிறது. தொடர்ந்து பாதாம் சாப்பிடுபவர்களுக்கு கெட்ட கொலஸ்ட்ரால் குறைவதுடன், நல்ல கொலஸ்ட்ரால் அதிகரிப்பதாகவும் ஆய்வுகள் தெரிவிக்கின்றன. மேலும் குடல் ஆரோக்கியத்தையும் இது மேம்படுத்துகிறது.

பசலைக்கீரை மற்றும் பிராசிகா குடும்ப கீரைகளில் நைட்ரேட்டுகள் அதிகமாக உள்ளதால் ரத்த ஓட்டம் சீராகும். இவை உடலில் நைட்ரிக் ஆக்சைடு உற்பத்தியை அதிகரித்து ரத்த அழுத்தத்தை கட்டுப்படுத்த உதவுகின்றன. இதில் உள்ள ஆன்டி-ஆக்ஸிடன்ட்கள் உடலில் ஏற்படும் அழற்சியை குறைத்து இதயம் மற்றும் மூளை செயல்பாட்டை பாதுகாக்கின்றன.

நீர்க்கடுகுக் கீரை இரும்புச்சத்து, கால்சியம், மெக்னீசியம் மற்றும் பி வைட்டமின்கள் நிறைந்த உணவாகும். இது நோய் எதிர்ப்பு சக்தியை அதிகரிப்பதுடன், கண் ஆரோக்கியத்தையும் பாதுகாக்க உதவுகிறது. மேலும் புற்றுநோய் செல்களின் வளர்ச்சியைத் தடுக்கக்கூடிய இயற்கை சேர்மங்களும் இதில் இருப்பதாக ஆய்வுகள் கூறுகின்றன.

பீட்ரூட் கீரையில் கால்சியம், வைட்டமின் K மற்றும் ஆன்டி-ஆக்ஸிடன்ட்கள் அதிகமாக உள்ளதால் கெட்ட கொலஸ்ட்ராலை குறைக்க உதவுகிறது. இதன் மூலம் செல்கள் ஆக்ஸிஜனேற்ற அழுத்தத்திலிருந்து பாதுகாக்கப்படுகின்றன. சில ஆய்வுகளில் புற்றுநோய் செல்களின் வளர்ச்சியையும் இது கட்டுப்படுத்தும் திறன் கொண்டதாக கண்டறியப்பட்டுள்ளது.

சியா விதைகள் ஒமேகா-3 மற்றும் நார்ச்சத்து நிறைந்தவை என்பதால் இதய ஆரோக்கியத்திற்கு சிறந்ததாக கருதப்படுகின்றன. ஆனால் முழு விதைகளை சாப்பிடுவதற்குப் பதிலாக அரைத்து பயன்படுத்தினால் அதன் முழு ஊட்டச்சத்துகளும் உடலுக்கு கிடைக்கும் என நிபுணர்கள் பரிந்துரைக்கின்றனர்.

பூசணி விதைகள் இதயத்தையும் நரம்பு மண்டலத்தையும் பாதுகாக்கும் சிறந்த உணவாக பார்க்கப்படுகின்றன. இதில் உள்ள ஒலிக் அமிலம் மற்றும் லினோலிக் அமிலம் உடலுக்கு நல்ல கொழுப்புகளை வழங்குகின்றன. பூசணி விதைகளை தொடர்ந்து உட்கொள்வதால் நினைவாற்றல் அதிகரித்தல், மன அழுத்தம் குறைதல் மற்றும் மூளை செயல்பாடு மேம்படுதல் போன்ற பல நன்மைகள் கிடைப்பதாக ஆய்வுகள் தெரிவிக்கின்றன. குறிப்பாக வறுத்த பூசணி விதைகள் அதிக பயனுள்ளதாக இருக்கலாம் என கூறப்படுகிறது.

டேன்டேலியன் கீரையில் வைட்டமின் A, C, E, K மற்றும் பல தாதுக்கள் அதிகமாக இருப்பதால் உடல் வீக்கம் குறைவதுடன் நோய் எதிர்ப்பு சக்தியும் அதிகரிக்கிறது. இதை சாலட், சூப் அல்லது தேநீர் வடிவிலும் பயன்படுத்தலாம்.

மொத்தத்தில், இந்த 7 சூப்பர் உணவுகளையும் தினசரி உணவில் சேர்ப்பது இதய ஆரோக்கியம், செரிமானம், மூளை செயல்பாடு மற்றும் நோய் எதிர்ப்பு சக்தியை மேம்படுத்த உதவும் என ஊட்டச்சத்து நிபுணர்கள் வலியுறுத்துகின்றனர்.