ஆஷஸ் தொடரில் இரண்டாவது அதிக ரன்கள்: டான் பிராட்மேனுக்கு அடுத்ததாக ஸ்டீவ் ஸ்மித் சாதனை

ஆஸ்திரேலியா – இங்கிலாந்து அணிகள் இடையிலான ஆஷஸ் கிரிக்கெட் தொடரில், ஆஸ்திரேலிய நட்சத்திர வீரர் ஸ்டீவ் ஸ்மித் புதிய சாதனை ஒன்றை படைத்துள்ளார். சிட்னி கிரிக்கெட் மைதானத்தில் நடைபெற்று வரும் ஐந்தாவது மற்றும் கடைசி டெஸ்ட் போட்டியின் போது, ஆஷஸ் தொடரில் அதிக ரன்கள் எடுத்த வீரர்கள் பட்டியலில் ஸ்மித் இரண்டாவது இடத்தை பிடித்துள்ளார்.

இந்த போட்டியின் இரண்டாவது நாளில் ஆஸ்திரேலியாவின் முதல் இன்னிங்ஸில் பேட்டிங் செய்த ஸ்மித், இங்கிலாந்தின் முன்னாள் ஜாம்பவான் ஜாக் ஹாப்ஸ் சாதனையை முறியடித்தார். ஹாப்ஸ், 41 போட்டிகளில் 71 இன்னிங்ஸ்களில் 3636 ரன்கள் எடுத்திருந்தார். அவரது சராசரி 54.26 ஆகும்.

அந்த சாதனையைத் தாண்டிய ஸ்மித், தற்போது 41 போட்டிகளில் 73 இன்னிங்ஸ்களில் 3644 ரன்கள் குவித்து, 56.93 என்ற சிறப்பான சராசரியுடன் இரண்டாவது இடத்தில் உள்ளார். ஆஷஸ் தொடரில் அவர் இதுவரை 13 சதங்கள் மற்றும் 15 அரை சதங்களை பதிவு செய்துள்ளார்.

ஆஷஸ் வரலாற்றில் அதிக ரன்கள் எடுத்த வீரர் என்ற சாதனை இன்னும் ஆஸ்திரேலிய கிரிக்கெட் ஜாம்பவான் டான் பிராட்மேனிடம் தான் உள்ளது. அவர் 37 போட்டிகளில் 63 இன்னிங்ஸ்களில் 5028 ரன்கள் குவித்து, 89.78 என்ற அதிசயமான சராசரியுடன் முதலிடத்தில் உள்ளார். பிராட்மேன் 19 சதங்கள் மற்றும் 12 அரை சதங்களை பதிவு செய்துள்ளார்.

இதற்கிடையில், இங்கிலாந்து முன்னாள் கேப்டன் ஜோ ரூட், இந்த போட்டியின் முதல் இன்னிங்ஸில் 160 ரன்கள் எடுத்தார். ஆஷஸ் தொடரில் அதிக ரன்கள் எடுத்த வீரர்கள் பட்டியலில் அவர் தற்போது எட்டாவது இடத்தில் உள்ளார். ரூட், 39 போட்டிகளில் 74 இன்னிங்ஸ்களில் 2822 ரன்கள், 41.50 சராசரியுடன் எடுத்துள்ளார். அவர் இதுவரை 6 சதங்கள் மற்றும் 18 அரை சதங்களை அடித்துள்ளார்.

மேலும், இந்த போட்டியில் ஸ்மித் தனது டெஸ்ட் கிரிக்கெட் வாழ்க்கையின் 37-வது சதத்தை பதிவு செய்தார். இது ஆஷஸ் தொடரில் அவரது 13-வது சதமாகும். இதன் மூலம், ஜாக் ஹாப்ஸ் (12 சதங்கள்) சாதனையை முறியடித்த ஸ்மித், ஆஷஸ் சதங்கள் பட்டியலில் டான் பிராட்மேனுக்கு (19) அடுத்த இடத்தில் உள்ளார்.

போட்டியின் நிலவரப்படி, டிராவிஸ் ஹெடின் 163 ரன்கள் மற்றும் ஸ்மித்தின் சதத்தின் உதவியுடன், ஆஸ்திரேலியா இங்கிலாந்தின் முதல் இன்னிங்ஸ் ஸ்கோர் 384 ரன்களைத் தாண்டி வலுவான முன்னிலையில் உள்ளது.