விரைவில் வீடு திரும்பும் அபிநந்தன்: அமெரிக்காவிடம் பாகிஸ்தான் உறுதி!

பாகிஸ்தான் ராணுவத்தால் கைது செய்யப்பட்ட இந்திய விமானப்படை விமானி அபிநந்தன் விரைவில் இந்தியாவிடம் ஒப்படைக்கப்படுவார் என பாகிஸ்தான் உறுதியளித்ததாக அமெரிக்கா தூதரக அதிகாரிகள் தெரிவித்துள்ளனர்.

புல்வாமா தாக்குதலுக்கு பதிலடி கொடுக்கும் விதமாக இந்திய ராணுவத்தின் விமானப்படை பாகிஸ்தான் எல்லையை தாண்டி பயங்கரவாதிகள் முகாம் மீது தாக்குதல் நடத்தியது. இதனால் பாகிஸ்தானும் பதில் தாக்குதல் நடத்த இரு நாடுகளுக்கும் இடையே பதற்றம் நீடித்தது. இந்நிலையில் இந்திய போர் விமானத்தை சுட்டு வீழ்த்திய பாகிஸ்தான் ராணுவம் இந்திய விமானி அபிநந்தனை கைது செய்தது.

இதனையடுத்து அபிநந்தன் கைதுசெய்யப்பட்ட மற்றும் விசாரணை செய்யப்படும் வீடியோ வெளியானதை அடுத்து அபிநந்தனை விடுவிக்க வேண்டும் என்ற கோரிக்கை பல தரப்பில் இருந்து எழுந்தது. இதனையடுத்து அபிநந்தனை விடுவிக்க ராஜாங்க ரீதியிலான நடவடிக்கைகளில் இந்தியா இறங்கியது. பாகிஸ்தான் தூதரை இந்தியா அழைத்து அபிநந்தனை விடுவிக்க வலியுறுத்தியது.

அதே நேரத்தில் பாகிஸ்தானில் உள்ள இந்திய தூதர் பாகிஸ்தான் வெளியுறவுத்துறை அதிகாரிகளை சந்தித்து அபிநந்தனை விடுவிக்க வலியுறுத்தினார். இந்நிலையில் இந்திய வீரர் அபிநந்தனை விரைவில் விடுவிப்பதாக அமெரிக்க தூதரகத்திடம் பாகிஸ்தான் உறுதி அளித்ததாக அமெரிக்கா தூதரக அதிகாரிகள் தகவல் தெரிவித்தனர். இந்நிலையில் அபிநந்தன் நாளை வீடு திரும்பலாம் என சில தகவல்கள் உலா வருகின்றன.