இந்தியா
Back Button Hijacking நடைமுறையைக் கட்டுப்படுத்த கூகுள் நிறுவனம் தனது கொள்கைகளை விரிவாக்கியுள்ளது.
இணையத்தளங்களில் பயனர்கள் முந்தைய பக்கத்திற்குச் செல்வதைத் தடுக்கும் Back Button Hijacking எனப்படும் தந்திரமான நடைமுறையைக் கட்டுப்படுத்த கூகுள் நிறுவனம் தனது கொள்கைகளை அதிரடியாக விரிவாக்கியுள்ளது.
சில இணையத்தளங்கள் உலாவியின் (Browser) செயல்பாட்டில் தன்னிச்சையாகத் தலையிட்டு, பயனர்கள் ‘Back’ பட்டனை அழுத்தும்போது அவர்கள் முந்தைய பக்கத்திற்குச் செல்வதைத் தடுக்கின்றன.
இதற்குப் பதிலாக, பயனர்களை அதே தளத்தில் கட்டாயப்படுத்தி இருக்கச் செய்தல் அல்லது தேவையற்ற விளம்பரங்களைக் காண்பித்தல் போன்ற செயல்களில் ஈடுபடுகின்றன. இத்தகைய தந்திரோபாயங்களே ‘Back Button Hijacking’ என அழைக்கப்படுகின்றன.
எதிர்வரும் ஜூன் 15 ஆம் தேதி முதல் இத்தகைய செயற்பாடுகள் தீங்கு விளைவிக்கும் நடைமுறையாக கருதப்படும் என கூகுள் அறிவித்துள்ளது.
இந்த விதிகளை மீறும் இணையத்தளங்கள் கூகுள் தேடல் முடிவுகளிலிருந்து (Search Results) தரமிறக்கப்படும் அல்லது முழுமையாக நீக்கப்படும் என எச்சரிக்கை விடுக்கப்பட்டுள்ளது.
“இந்த மோசடி நடவடிக்கை பயனர்களின் இயல்பான இணையப் பயணத்தைச் சிதைப்பதுடன், அவர்களை ஏமாற்றமடையச் செய்கிறது. இதனால் அறிமுகமில்லாத இணையத்தளங்களுக்குச் செல்ல பயனர்கள் அச்சப்படுகின்றனர்,” என கூகுள் நிறுவனம் தனது வலைப்பதிவில் சுட்டிக்காட்டியுள்ளது.
இது குறித்து தகவல் தொழில்நுட்பத்திற்கான சாசன நிறுவனத்தின் (BCS) டிஜிட்டல் பிரிவு பணிப்பாளர் ஆடம் தாம்சன் (Adam Thompson) தெரிவிக்கையில், இணையத்தின் அடிப்படைப் பயன்பாட்டு விதிகளையே இத்தகைய மோசடிகள் உடைப்பதாகவும், எனவே கூகுள் எடுக்கும் இந்த நடவடிக்கை அவசியமானது என்றும் தெரிவித்தார்.
