வந்தது ஓடிபி மோசடிகளுக்கு முற்றுப்புள்ளி – ஏர்டெல்லின் புதிய ஏஐ பாதுகாப்பு வசதி கலக்க வருகிறது.

டெலிவரி ஊழியர்கள் அல்லது வங்கி அதிகாரிகள் போல் பேசி வாடிக்கையாளரின் வங்கி ஓடிபி எண்களைப் பறிக்கும் மோசடி கும்பலிடம் இருந்து பொதுமக்களைப் பாதுகாக்கும் நோக்கத்துடன் ஏர்டெல் நிறுவனம் நிகழ்நேர எச்சரிக்கை செய்யக்கூடிய வகையில் புதிய ஏஐ பாதுகாப்பு வசதியை அறிமுகம் செய்ய திட்டமிட்டுள்ளது.

இந்த புதிய வசதியின்படி ஒரு வாடிக்கையாளர் அழைப்பில் இருக்கும் போதே அவரது கைப்பேசிக்கு வங்கி தொடர்பான ஓடிபி வந்தால் ஏர்டெல்லின் ஏஐ அமைப்பு அதை உடனடியாகக் கண்டறியும். அந்த அழைப்பு மோசடியானதாக இருக்கக்கூடும் என்று கருதினால் வாடிக்கையாளரின் திரையில் உடனடி எச்சரிக்கை அறிவிப்பைக் காட்டும்.

இவ்வாறு மோசடிகளை நிகழ்நேரத்தில் கண்டறிந்து தடுக்கும் வகையில் வடிவமைக்கப் பட்டுள்ள இந்த தொழில்நுட்பம் ஏற்கனவே அரியானாவில் வெற்றிகரமாக சோதனை செய்யப்பட்டுள்ளது.

அடுத்த 2 வாரங்களுக்குள் இந்தியாவில் உள்ள அனைத்து ஏர்டெல் வாடிக்கையாளர்களுக்கும் இந்த வசதி விரிவுபடுத்தப்பட உள்ளதாக தெரிவிக்கப்பட்டுள்ளது.