தாய்லாந்தில் கண்டுபிடிக்கப்பட்ட புதிய ராட்சத டைனோசர்: 27 மீட்டர் நீளம், 27 டன் எடை கொண்ட அதிசயம்!

தென்கிழக்கு ஆசியாவில் இதுவரை கண்டறியப்பட்ட மிகப்பெரிய டைனோசர் இனங்களில் ஒன்றாக கருதப்படும் புதிய ராட்சத டைனோசரின் புதைபடிவங்களை தாய்லாந்தில் விஞ்ஞானிகள் கண்டுபிடித்துள்ளனர். இந்த கண்டுபிடிப்பு உலக விஞ்ஞான உலகில் பெரும் கவனத்தை ஈர்த்துள்ளது.

சுமார் 10 ஆண்டுகளுக்கு முன்பு, தாய்லாந்தின் வடகிழக்கு பகுதியில் உள்ள சையாபும் மாகாணத்தில் ஒரு குளம் அருகே சில பழங்கால எலும்புகள் கண்டெடுக்கப்பட்டன. இந்த எலும்புகளை லண்டன் பல்கலைக்கழகக் கல்லூரி மற்றும் தாய்லாந்தின் மகாசரகம் பல்கலைக்கழகத்தைச் சேர்ந்த ஆராய்ச்சியாளர்கள் இணைந்து நீண்டகாலமாக ஆய்வு செய்து வந்தனர்.

இந்த ஆய்வின் முடிவுகள் தற்போது புகழ்பெற்ற Scientific Reports அறிவியல் இதழில் வெளியிடப்பட்டுள்ளன.

புதிய டைனோசருக்கு என்ன பெயர்?

இந்த புதிய டைனோசர் இனத்திற்கு “நாகாடைட்டன் சையாபுமென்சிஸ்” (Nagatitan chaiyaphumensis) என்று பெயரிடப்பட்டுள்ளது. இதில் “நாகா” என்பது தென்கிழக்கு ஆசிய புராணங்களில் வரும் நீர் நாகத்தை குறிக்கிறது. “டைட்டன்” என்பது கிரேக்க புராணங்களில் வரும் ராட்சதர்களைக் குறிக்கிறது. “சையாபுமென்சிஸ்” என்பது இந்த உயிரினம் கண்டுபிடிக்கப்பட்ட சையாபும் மாகாணத்தின் பெயரை அடிப்படையாகக் கொண்டது.

இது தாய்லாந்தில் அதிகாரப்பூர்வமாக பெயரிடப்பட்ட 14வது டைனோசர் இனமாகும்.

27 மீட்டர் நீள ராட்சதம்

விஞ்ஞானிகள் கண்டெடுத்த முதுகெலும்பு, விலா எலும்பு, இடுப்பு மற்றும் கால்களின் எலும்புகளை ஆய்வு செய்தபோது, இந்த டைனோசர் மிகவும் பிரம்மாண்டமான உடல் அமைப்பைக் கொண்டிருந்தது தெரியவந்தது.

அதன் முன் கால் எலும்பு மட்டும் சுமார் 1.78 மீட்டர் நீளம் கொண்டிருந்ததாக கூறப்படுகிறது. இதன் அடிப்படையில், இந்த டைனோசர் சுமார் 27 மீட்டர் நீளமும், 27 டன் எடையும் கொண்டிருக்கலாம் என ஆய்வாளர்கள் மதிப்பிட்டுள்ளனர்.

இந்த எடை சுமார் ஒன்பது ஆசிய யானைகளின் மொத்த எடைக்கு சமமானதாகும்.

எந்த காலத்தைச் சேர்ந்தது?

இந்த டைனோசர் நீண்ட கழுத்து மற்றும் நீண்ட வாலை கொண்ட தாவர உணவுப் பிராணிகளான “சாரோபாட்” குடும்பத்தைச் சேர்ந்ததாக விஞ்ஞானிகள் தெரிவித்துள்ளனர்.

மேலும், இது “யுஹெலோபோடிடே” எனப்படும் ஆசியாவில் வாழ்ந்த ஒரு அரிய உள்வகையைச் சேர்ந்தது என்றும், சுமார் 100 முதல் 120 மில்லியன் ஆண்டுகளுக்கு முன்பு வாழ்ந்த ஆரம்பகால கிரெட்டேசியஸ் காலத்தைச் சேர்ந்த உயிரினம் என்றும் ஆய்வுகள் உறுதிப்படுத்தியுள்ளன.