பாஜகவை வளரவிட்டால் தமிழகம், கர்நாடகம் போல் மாறிவிடும்: கனிமொழி

தமிழகத்தில் பாஜகவை வளரவிட்டால் தமிழகமும் கர்நாடகமும் போல் மாறிவிடும் என திமுக எம்பி கனிமொழி தெரிவித்துள்ளார்.

தமிழகத்தில் வரும் பிப்ரவரி 19ஆம் தேதி நகர்ப்புற உள்ளாட்சி தேர்தல் நடைபெற உள்ள நிலையில் அனைத்து கட்சி தலைவர்கள் தீவிர பிரச்சாரம் செய்து வருகின்றனர். இந்த நிலையில் கோவில்பட்டி மாவட்டம் தூத்துக்குடி நகராட்சியில் போட்டியிடும் திமுக மற்றும் கூட்டணி கட்சி வேட்பாளர்களுக்கு ஆதரவாக கனிமொழி இன்று தேர்தல் பிரச்சாரம் ஈடுபட்டார்.

அப்போது அவர் பேசும்போது, ‘ மதம் என்ற பெயரில் கர்நாடகாவில் நடைபெற்றுக் கொண்டிருக்கும் கலவரங்களை பார்த்துக் கொண்டிருக்கிறோம். தமிழகத்திலும் பாஜக காலடி எடுத்து வைத்தால் தமிழகம், கர்நாடக மாநிலம் போல் ஆகிவிடும் அபாயம் உள்ளது. எனவே பாஜகவிற்கு கொஞ்சம் கூட இடம் கொடுக்கக்கூடாது.

ஒற்றுமையாக தமிழர்களாகிய நாம் வாழ்ந்துகொண்டிருக்கிறோம். அதே பாதுகாப்பு உணர்வுடன் வாழ வேண்டுமானால், திமுக கூட்டணிக்கு வாக்களியுங்கள் என்று பேசினார். மேலும் தேசியக் கொடியை எடுத்து விட்டு காவி கொடியை ஏற்றி அவமானப்படுத்தியவர்கள் தேசியம் பற்றி பேசுகிறார்கள் என்றும் சுதந்திர போராட்ட வீரர்கள் புகைப்படங்கள் இடம்பெற்ற ஊர்தியை நிராகரித்துவிட்டு அவர்கள் யார் என்று தங்களுக்கு தெரியாது என்று அவமானப்படுத்தி திருப்பி அனுப்பியவர்களுக்கா உங்கள் ஓட்டு? என்றும் அவர் கேள்வி எழுப்பினார்.

பாஜகவும் அதிமுகவும் நாணயத்தின் இரு பக்கங்கள் என்றும் இரண்டு கட்சிகளுமே தமிழ் நாட்டுக்கு அவமானம் என்றும் எனவே தமிழக மக்களுக்கு உறுதுணையாக இருக்கும் திமுக வேட்பாளருக்கு வாக்களிக்க வேண்டும் கனிமொழி கேட்டுக்கொண்டார்.