மகாராஷ்டிராவில் மின்னல் வேகத்தில் பரவும் உருமாறிய கொரோனா; ஒரே பள்ளியில் 225 மாணவர்களுக்கு தொற்று!

மகாராஷ்டிர மாநிலத்தில் கடந்த சில நாட்களாக கொரோனா வைரஸ் தொற்றால் பாதிக்கப்படுவோரின் எண்ணிக்கை தொடர்ந்து அதிகரித்து வருகிறது. இந்நிலையில் அம்மாநிலத்தின் வாஷிம் மாவட்டத்தைச் சேர்ந்த ஒரு பள்ளியில் 225 மாணவர்களுக்கு கொரோனா தொற்று பாதிப்பு உறுதி செய்யப்பட்டு உள்ளது.

மாணவர்களைத் தவிர நான்கு ஆசிரியர்களுக்கும் பள்ளியில் கொரோனா பாதிப்பு உறுதி செய்யப்பட்டு உள்ளது. தற்போது அந்தப் பள்ளி கன்டெய்ன்மென்ட் பகுதியாக அறிவிக்கப்பட்டு உள்ளது.

புதன் கிழமையான நேற்று மட்டும் மகாராஷ்டிராவில் 8,800 பேருக்கு கொரோனா தொற்று உறுதியானது. கடந்த 4 மாதங்களில் இல்லாத வகையிலான அதிகரிப்பு இது. இந்நிலையில் இனி வரும் நாட்களில் மாநில மக்கள் கொரோனா கட்டுப்பாடு விதிமுறைகளை முறையாக பின்பற்றவில்லை என்றால், கடுமையான நடவடிக்கை எடுக்கப்படும் என்று மகாராஷ்டிர அரசு எச்சரித்துள்ளது.

மகாராஷ்டிராவில் உருமாறிய புது வகை கொரோனா மிக அதிக வேகத்தில் பரவி வருவதாக தகவல்கள் வந்து கொண்டிருக்கும் நிலையில், ஒரு பள்ளியையே மூடும் அளவக்கு கொரோனா தொற்று ஏற்பட்டுள்ளது குறிப்பிடத்தக்கது.