கலைஞர் மகளிர் உரிமைத்தொகை 2026: புதிய விண்ணப்பத்திற்கு தேவையான ஆவணங்கள் என்ன?

தமிழக அரசின் முக்கிய நலத்திட்டங்களில் ஒன்றான கலைஞர் மகளிர் உரிமைத்தொகை திட்டத்தில் தேர்தலுக்கு பிறகு புதிய பயனாளிகள் சேர்க்கப்படலாம் என்ற தகவல் வெளியாகியுள்ளது. இதற்கான அதிகாரப்பூர்வ அறிவிப்பு மே மாத இறுதி அல்லது ஜூன் மாத தொடக்கத்தில் வெளியாக வாய்ப்பு இருப்பதாக கூறப்படுகிறது.

இந்த திட்டத்தின் கீழ் தகுதியான பெண்களுக்கு மாதந்தோறும் ரூ.2000 வழங்கப்பட உள்ளதால், புதிய ரேஷன் கார்டு பெற்றவர்கள் மற்றும் முன்பு விண்ணப்பிக்க தவறியவர்கள் மீண்டும் விண்ணப்பிக்க ஆர்வமாக காத்திருக்கின்றனர்.

விண்ணப்பிக்க தேவையான முக்கிய ஆவணங்கள்

ரேஷன் கார்டு

கலைஞர் மகளிர் உரிமைத்தொகை திட்டத்தில் விண்ணப்பிக்க குடும்ப ரேஷன் கார்டு கட்டாயமாகும். அதில் 21 வயதுக்கு மேற்பட்ட பெண் உறுப்பினர் இடம்பெற்றிருக்க வேண்டும்.

ஆதார் அட்டை

விண்ணப்பதாரரின் அடையாளத்தை உறுதி செய்ய ஆதார் அட்டை அவசியம். ஆதாரில் உள்ள பெயர், முகவரி உள்ளிட்ட விவரங்கள் தற்போதைய தகவல்களுடன் பொருந்தியிருக்க வேண்டும்.

வங்கி கணக்கு விவரம்

உரிமைத்தொகை நேரடியாக வங்கி கணக்கில் செலுத்தப்படுவதால், வங்கி பாஸ்புக் நகல் சமர்ப்பிக்க வேண்டும். மேலும், வங்கி கணக்கு ஆதாருடன் இணைக்கப்பட்டிருக்க வேண்டும்.

வருமானச் சான்று

குடும்பத்தின் ஆண்டு வருமானம் ரூ.2.5 லட்சத்திற்கு கீழ் இருக்க வேண்டும். இதை உறுதிப்படுத்த வருமானச் சான்று கேட்கப்படலாம்.

மின்சார கட்டண ரசீது

வீட்டு மின் நுகர்வு ஆண்டுக்கு 3,600 யூனிட்டிற்குள் இருக்க வேண்டும் என்பதால், சமீபத்திய EB ரசீதை வைத்திருப்பது நல்லது.

நில ஆவணங்கள்

விண்ணப்பிக்கும் குடும்பத்திற்கு 5 ஏக்கருக்கு மேல் நஞ்சை நிலம் அல்லது 10 ஏக்கருக்கு மேல் புஞ்சை நிலம் இருக்கக்கூடாது. தேவையெனில் பட்டா அல்லது சிட்டா விவரங்கள் வழங்க வேண்டும்.

வாகன விவரம்

குடும்பத்தில் கார் அல்லது ஜீப் போன்ற நான்கு சக்கர வாகனங்கள் இருந்தால், இத்திட்டத்தில் தகுதி கிடைக்காது.

மொபைல் எண்

ஆதாருடன் இணைக்கப்பட்ட செயல்பாட்டிலுள்ள மொபைல் எண் அவசியம். விண்ணப்ப நிலை மற்றும் பணம் வரவு குறித்த தகவல்கள் SMS மூலம் அனுப்பப்படும்.

மேலும், மாற்றுத்திறனாளிகள் மற்றும் விதவை ஓய்வூதியம் பெறாத தகுதியான பெண்களும் தேவையான சான்றிதழ்களுடன் விண்ணப்பிக்கலாம் என தெரிவிக்கப்பட்டுள்ளது. அனைத்து தகுதியான பெண்களுக்கும் இந்த திட்டத்தின் பலன் கிடைப்பதை அரசு உறுதி செய்ய முயற்சி செய்து வருகிறது.