போப் பிரான்சிஸ் உடல்நிலை குறைவு: அடுத்த போப் தேர்வு எப்படி நடைபெறும்?

போப் பிரான்சிஸ் உடல்நிலை குறைவு: அடுத்த போப் தேர்வு எப்படி நடைபெறும்?

கத்தோலிக்க கிறிஸ்தவத்தின் தலைவரான திருத்தந்தை போப் பிரான்சிஸ் (88) கடந்த பிப்ரவரி 14 ஆம் தேதி சுவாச பிரச்சினையால் இத்தாலியில் உள்ள ஜெமெல்லி மருத்துவமனையில் அனுமதிக்கப்பட்டார். அவருக்கு சிக்கலான நுரையீரல் தொற்று மற்றும் சிறுநீரக நோய்கள் உள்ளதாக தெரிவிக்கப்பட்டுள்ளது. தற்போது அவரது உடல்நிலை கவலைக்கிடமாக உள்ளதால், அவருக்குப் பிறகு புதிய போப் யார் என்பதில் சர்ச்சைகள் எழுந்துள்ளன.

போப் பிரான்சிஸ் யார்?

போப் பதவியில் உள்ள 266வது தலைவராக உள்ள போப் பிரான்சிஸ், தென் அமெரிக்காவைச் சேர்ந்த முதல் திருத்தந்தையாகும். அவரின் இயற்பெயர் ஜார்ஜ் மரியோ பெர்கோக்லியோ. 1936 ஆம் ஆண்டு அர்ஜென்டினாவில் பிறந்த அவர், 1969 இல் குருவாக அருட்பொழிவு பெற்றார். 2013ல் போப் பெனடிக்ட் பதவியை ராஜினாமா செய்ததை தொடர்ந்து, புதிய போப்பாக தேர்ந்தெடுக்கப்பட்டார்.

போப் பிரான்சிஸ், சமூக நல திட்டங்களை ஊக்குவித்தும், தேவாலயத்துக்குள் புதுமை மற்றும் சீர்திருத்தங்களை கொண்டு வந்தவராகவும் பெயர் பெற்றவர். அதே நேரத்தில், ஓரின சேர்க்கை திருமணத்தையும், பெண்களுக்கு குரு பதவியை வழங்குவதையும் எதிர்த்தவராகவும் அவரைக் கூறலாம்.

போப் இறந்தால் அல்லது ராஜினாமா செய்தால் என்ன நடக்கும்?

கத்தோலிக்க திருச்சபையின் சட்டங்கள் மற்றும் மரபுகள் புதிய போப் தேர்வுக்காக மிகவும் கடுமையான முறைகளை பின்பற்றுகின்றன. போப் இறந்தவுடன் முதலில், கார்டினல் கேமர்லெங்கோ அவரின் மரணத்தை உறுதி செய்து, உலகளவில் அறிவிக்கிறார். பின்னர், போப்பின் அதிகாரப்பூர்வ மோதிரமான “மீனவர் மோதிரம்” உடைக்கப்படும்.

இதற்குப் பிறகு, திருத்தந்தையின் உடல் செயின்ட் பீட்டர்ஸ் பசிலிக்காவில் பொதுமக்கள் பார்வைக்காக வைக்கப்படும். இறுதிச் சடங்கு பொதுவாக செயின்ட் பீட்டர்ஸ் சதுக்கத்தில் நடைபெறும்.

புதிய போப் தேர்வு – கான்க்ளேவ் செயல்முறை

போப் காலியாகி 15 முதல் 20 நாட்களுக்குள், 80 வயதிற்குட்பட்ட அனைத்து கார்டினல்கள் வத்திக்கான் நகரில் உள்ள “சிஸ்டைன் சேப்பல்” (Sistine Chapel) ஆலயத்தில் கூடுவார்கள். இங்கு ரகசிய வாக்கெடுப்பு மூலம் புதிய போப்பை தேர்ந்தெடுக்கின்றனர்.

புதிய போப் தேர்வாக மூன்றில் இரண்டு பங்கு பெரும்பான்மையை பெற வேண்டும். ஒவ்வொரு வாக்கெடுப்பிற்குப் பிறகும், சிஸ்டைன் சேப்பலில் இருந்து புகை வெளிவரும்.

• கருப்பு புகை – புதிய போப் தேர்வு செய்யப்படவில்லை
• வெள்ளை புகை – புதிய போப் தேர்வு செய்யப்பட்டார்

புதிய போப் தேர்ந்தெடுக்கப்பட்டவுடன், அவருக்கு புதிய பெயர் தேர்வு செய்ய வாய்ப்பு வழங்கப்படும். பின்னர், செயின்ட் பீட்டர்ஸ் பசிலிக்காவின் பிரதான பால்கனியில் இருந்து, “Habemus Papam” (நமக்கு புதிய போப் உள்ளார்) என்ற அறிவிப்பு வெளியிடப்படும்.

போப் பெனடிக்ட் பதவி விலகியபோது நடந்தது?

2013ல், போப் பெனடிக்ட் உடல்நலக் காரணங்களுக்காக ராஜினாமா செய்தார். அவருக்குப் பிறகு நடந்த கான்க்ளேவில், போப் பிரான்சிஸ் தேர்ந்தெடுக்கப்பட்டார்.

இம்முறை, போப் பிரான்சிஸ் உடல்நிலையில் ஏற்பட்ட மோசமான நிலைமையை முன்னிட்டு, திருச்சபை அடுத்த போப்பை தேர்ந்தெடுக்கும் சூழல் உருவாகியுள்ளது. அவரது உடல்நிலை தொடர்பாக மேலும் அதிகாரப்பூர்வ தகவல்கள் வெளியிடப்பட வேண்டியுள்ளது.