8வது ஊதியக்குழு அப்டேட்: மத்திய அரசு ஊழியர்களுக்கு சம்பள உயர்வு? Fitment Factor, ஓய்வூதியம் குறித்து புதிய தகவல்!

மத்திய அரசு ஊழியர்கள் மற்றும் ஓய்வூதியதாரர்கள் ஆவலுடன் எதிர்பார்த்து வரும் 8வது ஊதியக்குழு (8th Pay Commission) தொடர்பான புதிய தகவல்கள் வெளியாகி பரபரப்பை ஏற்படுத்தியுள்ளன. குறிப்பாக, சமீபத்தில் நடைபெற்ற தேசிய கவுன்சில் கூட்டு ஆலோசனைக் குழு (NC-JCM) 49வது கூட்டம், அரசு ஊழியர்களின் சம்பளம் மற்றும் ஓய்வூதியத்தில் பெரிய மாற்றங்களுக்கு வழிவகுக்கும் என எதிர்பார்க்கப்படுகிறது.

டெல்லியில் அமைச்சரவைச் செயலாளர் டி.வி. சோமநாதன் தலைமையில் நடைபெற்ற இந்த முக்கிய கூட்டத்தில், மத்திய அரசு அதிகாரிகள் மற்றும் பல்வேறு ஊழியர் சங்க பிரதிநிதிகள் கலந்து கொண்டு சம்பள உயர்வு, Fitment Factor, பதவி உயர்வு மற்றும் ஓய்வூதிய திட்டங்கள் குறித்து விரிவாக விவாதித்தனர்.

ஊழியர் சங்கங்கள் சார்பில், தற்போதைய குறைந்தபட்ச சம்பளத்தை கணிசமாக உயர்த்த வேண்டும் என்ற கோரிக்கை வலியுறுத்தப்பட்டது. அதேபோல், Fitment Factor அதிகரிக்கப்பட்டால் மட்டுமே ஊழியர்களின் நிகர சம்பளத்தில் பெரிய உயர்வு கிடைக்கும் என்றும் தெரிவிக்கப்பட்டது.

மேலும், வருடாந்திர சம்பள உயர்வு முறையை மறுசீரமைத்தல், தகுதியான ஊழியர்களுக்கு விரைவான பதவி உயர்வு வழங்குதல் போன்ற கோரிக்கைகளும் முன்வைக்கப்பட்டன. புதிய ஓய்வூதியத் திட்டமான NPS-க்கு மாற்றாக, பழைய ஓய்வூதியத் திட்டத்தின் பலன்கள் கிடைக்க வேண்டும் என்ற கோரிக்கையும் மீண்டும் எழுப்பப்பட்டது.

சுகாதார வசதிகள் தொடர்பாகவும் முக்கிய ஆலோசனைகள் நடைபெற்றன. CGHS மற்றும் CS(MA) திட்டங்களின் கீழ் மருத்துவ செலவுகளுக்கான முழுமையான ஈட்டுத்தொகை வழங்கப்பட வேண்டும் என்றும், செவித்திறன் கருவிகளுக்கான நிதி உதவித் தொகையை புதுப்பிக்க வேண்டும் என்றும் ஊழியர் தரப்பு கோரிக்கை வைத்தது.

அதேபோல், PM Shri Kendriya Vidyalaya பள்ளிகளில் கல்வி உதவித்தொகை உயர்த்துதல் மற்றும் கூடுதல் CGHS மையங்களை அமைத்தல் பற்றியும் விவாதிக்கப்பட்டது. இந்த விவகாரங்களில் மூன்று மாதங்களுக்குள் முடிவு எடுக்க அதிகாரிகளுக்கு அமைச்சரவைச் செயலாளர் உத்தரவிட்டதாக தகவல்கள் தெரிவிக்கின்றன.

தற்போதைய தகவல்களின் அடிப்படையில், 8வது ஊதியக்குழு பரிந்துரைகள் 2026 ஜனவரி முதல் அமலுக்கு வர வாய்ப்புள்ளதாக கூறப்படுகிறது. இந்த மாற்றங்கள் நடைமுறைக்கு வந்தால், நாடு முழுவதும் உள்ள 1.2 கோடிக்கும் அதிகமான மத்திய அரசு ஊழியர்கள் மற்றும் ஓய்வூதியதாரர்கள் பயனடைவார்கள் என எதிர்பார்க்கப்படுகிறது.