EPFO முக்கிய அறிவிப்பு: செயலற்ற PF கணக்கை மீண்டும் ஆக்டிவேட் செய்வது எப்படி? முழு வழிகாட்டி இதோ!

ஊழியர்களின் வருங்கால வைப்பு நிதி அமைப்பான EPFO, செயலற்ற நிலையில் இருக்கும் PF கணக்குகளை மீண்டும் செயல்பாட்டிற்கு கொண்டு வருவதற்கான முக்கிய வழிகாட்டுதல்களை வெளியிட்டுள்ளது. வேலை மாற்றம், KYC விவரங்கள் முழுமையில்லாமை அல்லது தொழில்நுட்ப கோளாறுகள் போன்ற காரணங்களால் பலரின் PF கணக்குகள் முடக்கப்பட்டிருக்கலாம். இப்படிப்பட்ட சூழலில் என்ன செய்ய வேண்டும் என்பதை EPFO தெளிவுபடுத்தியுள்ளது.

ஒருவரிடம் UAN (Universal Account Number) இல்லையெனில், முதலில் அதை உருவாக்க வேண்டும். இதற்காக EPFO அலுவலகத்திற்கு நேரில் செல்லலாம். நேரில் செல்ல முடியாதவர்கள் EPFIGMS தளத்தின் மூலம் ஆன்லைனில் கோரிக்கை அளிக்கலாம்.

UAN உருவாக்கும் போது வங்கி விவரங்கள் மற்றும் பயோமெட்ரிக் சரிபார்ப்பு அவசியமாகும். அதன் பிறகு KYC சரிபார்ப்பை முடிக்க வேண்டும். ஆதார், PAN மற்றும் வங்கிக் கணக்கு விவரங்களை UAN-உடன் இணைப்பது மிகவும் முக்கியம் என EPFO வலியுறுத்தியுள்ளது.

KYC சரிபார்ப்பு ஆன்லைன் மூலமாகவோ அல்லது EPFO அலுவலகத்திற்குச் சென்று நேரிலோ செய்யலாம். KYC செயல்முறை முடிந்த பிறகு, PF கணக்கை மீண்டும் செயல்பாட்டிற்கு கொண்டு வருவதற்கான விண்ணப்பத்தை சமர்ப்பிக்க வேண்டும். கோரிக்கை ஒப்புதல் பெற்றவுடன் கணக்கு மீண்டும் செயல்பாட்டிற்கு வரும்.

சில நேரங்களில் தொழில்நுட்ப பிரச்சனைகள் அல்லது தகவல் முரண்பாடுகள் காரணமாக ஆன்லைன் செயல்முறை செயல்படாமல் இருக்கலாம். அப்படியானால் அருகிலுள்ள EPFO அலுவலகத்திற்குச் சென்று ‘Joint Declaration Form’ நிரப்ப வேண்டும். இந்தப் படிவம் தற்போதைய அல்லது முந்தைய நிறுவனத்தால் சரிபார்க்கப்பட வேண்டும். அதனுடன் ஆதார் மற்றும் PAN அட்டைகளின் நகல்களையும் சமர்ப்பிக்க வேண்டும்.

மேலும், PF கணக்கு தொடர்ந்து செயல்பாட்டில் இருக்க வேண்டுமெனில், வேலை மாற்றிய உடனேயே பழைய PF கணக்கிலிருந்த தொகையை புதிய கணக்கிற்கு மாற்றிக்கொள்ள வேண்டும் என்று EPFO அறிவுறுத்தியுள்ளது. இதன் மூலம் பணி வரலாறு தொடர்ந்து பராமரிக்கப்படுவதுடன், கணக்கு செயலற்ற நிலைக்குச் செல்லும் அபாயமும் குறையும்.

அதேபோல், உறுப்பினர்கள் தங்களின் e-passbook-ஐ அடிக்கடி சரிபார்த்து, UAN கடவுச்சொல்லை அவ்வப்போது புதுப்பித்து வைத்திருக்கவும் அறிவுறுத்தப்பட்டுள்ளது.