நம்ப ‘யார்க்கர் கிங்’ நடராஜனா இது? – ஸ்டைலா… கெத்தா…

இந்திய கிரிக்கெட் அணியில் இடம் பிடித்திருக்கிறார் தமிழகத்தைச் சேர்ந்த வேகப்பந்து வீச்சாளர் நடராஜன். தனது யார்க்கர்களுக்காகவே அணியில் சேர்க்கப்பட்டவருக்கு, தற்போது ஆஸ்திரேலிய கிரிக்கெட் அணிக்கு எதிராக நடந்து வரும் ஒருநாள் மற்றும் டி20 தொடரில் வாய்ப்பு அளிக்கப்பட்டது. கொடுத்த வாய்ப்பை லாவகமாக பயன்படுத்திக் கொண்டு கெத்து காட்டிவிட்டார் நடராஜன்.

தான் அறிமுகமான முதல் ஒருநாள் போட்டியிலேயே தனது முதல் சர்வதேச விக்கெட்டைக் கைப்பற்றினார். அடுத்து நடந்த டி20 தொடரிலும் இந்திய அணி தொடரை வெல்வதற்கு முக்கிய காரணமாக இருந்தார். டி20 தொடரில் பேட்டிங்கில் கலக்கிய அதிரடி மன்னன் ஹர்திக் பாண்டியாவுக்கு, தொடர் நாயகன் விருது கொடுக்கப்பட்டது. ஆனால் அவரோ, ‘இந்த தொடர் நாயகன் விருதுக்குத் தகுதியானவர் நடராஜன்தான்’ என்று கூறி அனைவரது மனங்களையும் வென்றார்.

இப்படி பாண்டியா ஒரு பக்கம் நடராஜனின் திறமையைப் புகழ்ந்து தள்ள, கேப்டன் விராட் கோலி, ‘நடராஜன் இந்திய அணிக்குக் கிடைத்துள்ளது பொக்கிஷம் போல’ என்று சான்றிதழ் கொடுத்துள்ளார். இப்படி இருக்கும் நடராஜன், நேற்று ஆஸ்திரேலியாவின் சிட்னி நகருக்கு அவுட்டிங் சென்றுள்ளார்.

ஸ்டைலான கூலிங் கிளாஸ், கச்சிதமான டி-ஷர்ட் என அவர் சிட்னியில் எடுத்துக் கொண்ட போட்டாவை சமூக வலைதளங்களில் பகிர்ந்துள்ளார். இது படுவைரலாக மாறியுள்ளது.