VPF திட்டம் என்ன? அதிக வட்டி, பாதுகாப்பான சேமிப்பு – மாதச் சம்பளம் வாங்குபவர்களுக்கு சூப்பர் திட்டம்!

ஒரு நிரந்தரமான நிறுவனத்தில் பணிபுரிந்து மாதச் சம்பளம் பெறும் ஊழியர்களின் வருங்கால நிதி பாதுகாப்புக்காக பிஎஃப் (PF – Provident Fund) திட்டம் செயல்படுத்தப்பட்டுள்ளது. இதில் ஊழியரின் சம்பளத்திலிருந்து ஒரு குறிப்பிட்ட தொகை பிடித்தம் செய்யப்படுவதோடு, அதே அளவு அல்லது நிர்ணயிக்கப்பட்ட தொகையை நிறுவனம் சார்பிலும் பங்களிப்பாக செலுத்தப்படுகிறது.

இதற்கு மேலாக, ஊழியர்கள் விருப்பப்பட்டால் தங்களது பிஎஃப் கணக்கில் கூடுதலாக சேமிக்க மத்திய அரசு வழங்கும் சிறப்பு திட்டமே தன்னார்வ வருங்கால வைப்பு நிதி (Voluntary Provident Fund – VPF) ஆகும். இந்த திட்டம் ஏற்கனவே பிஎஃப் கணக்கு வைத்திருக்கும் மாதச் சம்பளம் பெறும் ஊழியர்களுக்காக மட்டுமே வடிவமைக்கப்பட்டுள்ளது. எனவே பிஎஃப் கணக்கு உள்ள எந்த ஊழியரும் இந்த VPF திட்டத்தில் இணையலாம்.

VPF திட்டத்தின் முக்கிய அம்சமாக, ஊழியர் தன் விருப்பப்படி மாதந்தோறும் கூடுதல் தொகையை சேமிக்க முடியும். பொதுவாக, ஆண்டுக்கு ஒருமுறை நிறுவனம் ஊழியர்களிடம் VPF பங்களிப்பு தொகையை குறித்து கேட்கும். அப்போது ரூ.1,000, ரூ.2,000, ரூ.5,000 போன்ற எந்த தொகையையும் தேர்வு செய்து செலுத்தலாம்.

VPF பங்களிப்புக்கு அதிகபட்ச வரம்பு என தனியாக எதுவும் இல்லை. ஊழியரின் அடிப்படைச் சம்பளம் + அகவிலைப்படி (Basic + DA) ஆகியவற்றின் 100 சதவீதம் வரை கூடுதலாக முதலீடு செய்ய முடியும் என்பதே இந்தத் திட்டத்தின் சிறப்பு.

VPF-க்கான வட்டி விகிதம் பிஎஃப் வட்டி விகிதத்துடன் சமமாக இருக்கும். தற்போது இந்த வட்டி விகிதம் சுமார் 8.25% ஆக உள்ளது. இதுபோன்ற அதிக வட்டி விகிதம் பாதுகாப்பான வேறு எந்த தனிநபர் சேமிப்பு திட்டங்களிலும் கிடைப்பது அரிது. அதனால், நீண்டகால சேமிப்பு மற்றும் ஓய்வுக்கால நிதி பாதுகாப்பை விரும்பும் ஊழியர்களுக்கு VPF ஒரு சிறந்த தேர்வாக கருதப்படுகிறது.